కేరళ అసెంబ్లీ ఎన్నికల ఫలితాల్లో యూడీఎఫ్ (UDF) ప్రభంజనం సృష్టించడంపై కాంగ్రెస్ పార్టీ సంస్థాగత వ్యవహారాల ఇన్చార్జ్ కేసీ వేణుగోపాల్ హర్షం వ్యక్తం చేశారు.

ఢిల్లీ వేదికగా ఆయన మీడియాతో మాట్లాడుతూ ఈ విజయాన్ని కేరళ ప్రజల విజయంగా అభివర్ణించారు. రాష్ట్రవ్యాప్తంగా యూడీఎఫ్ తరంగం ఉధృతంగా వీచిందని చెప్పారు. తమ కూటమికి 102 స్థానాలను కట్టబెట్టి చారిత్రాత్మకమైన తీర్పునిచ్చిన మూడు కోట్ల మంది కేరళ ప్రజలకు ఆయన హృదయపూర్వక కృతజ్ఞతలు తెలియజేశారు. సుదీర్ఘకాలంగా ఉన్న ఎర్రకోటలు ఈ ఎన్నికల్లో కూలిపోయాయని సంప్రదాయ రాజకీయ సమీకరణాలను ఓటర్లు తిరస్కరించారని విశ్లేషించారు.

రాష్ట్రంలోని యువత, మహిళలు, రైతులు తమపై ఉంచిన నమ్మకానికి ఈ ఫలితాలే నిదర్శనమని వేణుగోపాల్ పేర్కొన్నారు. కుల, మత, ప్రాంతీయ భేదాలకు అతీతంగా సామాన్య ప్రజలందరూ యూడీఎఫ్ వైపు నిలబడ్డారని చెప్పారు. కాంగ్రెస్ అధ్యక్షుడు మల్లికార్జున ఖర్గే మార్గదర్శకత్వంలో ప్రతిపక్ష నాయకుడు రాహుల్ గాంధీ చైతన్యవంతమైన నాయకత్వంలో సాగిన ఐక్య పోరాటం వల్లే ఈ అద్భుత విజయం సాధ్యమైందని కొనియాడారు. ప్రజల గొంతుకను వినే పారదర్శకమైన సంక్షేమ ప్రభుత్వాన్ని కేరళలో త్వరలోనే ఏర్పాటు చేస్తామని ఆయన ధీమా వ్యక్తం చేశారు.

ప్రతి మలయాళీకి గౌరవం, న్యాయం అందించడమే తమ ప్రభుత్వ లక్ష్యమని వేణుగోపాల్ స్పష్టం చేశారు. కేరళ ప్రజల విశ్వాసాలను రక్షిస్తామని హామీ ఇచ్చారు. ఈ విజయం తమపై అత్యంత భారీ బాధ్యతను ఉంచిందని ఆయన అభిప్రాయపడ్డారు. ప్రజల అంచనాలను మించి పనిచేసి కేరళను అన్ని రంగాల్లో తీర్చిదిద్దడానికి శాయశక్తులా కృషి చేస్తామని వివరించారు. ఈ అపూర్వ విజయం దేశవ్యాప్తంగా కాంగ్రెస్ శ్రేణుల్లో కొత్త ఉత్సాహాన్ని నింపిందని చెప్పారు. చివరగా జై యూడీఎఫ్, జై కేరళం, జై హింద్ నినాదాలతో తన ప్రసంగాన్ని ముగించారు.