Bhubaneswar: ఒడిశా రాజధాని భువనేశ్వర్‌లోని పలాసునీ బ్రిడ్జ్‌పై ఒక భయంకరమైన రోడ్డు ప్రమాదం జరిగింది. వేగంగా దూసుకొచ్చిన ఒక భారీ ట్రక్కు, అక్కడ వెళ్తున్న కారును వెనుక నుంచి బలంగా ఢీకొట్టింది.

అంతటితో ఆగకుండా ఆ కారును దాదాపు 600 మీటర్ల దూరం వరకు రోడ్డుపై ఘోరంగా ఈడ్చుకెళ్లింది. ఈ ప్రమాదం జరుగుతున్న సమయంలో కారులో ఒక తండ్రి, ఆయన కూతురు ఉన్నారు.

ట్రక్కు డ్రైవర్ వాహనాన్ని ఆపకుండా కారును అంత దూరం లాక్కెళ్లడం అక్కడి ప్రయాణికులను తీవ్ర భయాందోళనలకు గురిచేసింది. కారు రోడ్డుపై రాపిడికి గురవుతూ వెళ్తున్న దృశ్యాలను వెనుక వస్తున్న కొందరు వాహనదారులు తమ ఫోన్లలో చిత్రీకరించారు. ఈ ఒంటిని గగుర్పొడిచే వీడియో సోషల్ మీడియాలో పోస్ట్ చేయడంతో అది కాస్తా క్షణాల్లో వైరల్‌గా మారింది.

ఈ ఘోర ప్రమాదం నుంచి కారులోని తండ్రీకూతుళ్లు ఇద్దరూ త్రుటిలో ప్రాణాలతో బయటపడటం గమనార్హం. వారికి కేవలం స్వల్ప గాయాలు మాత్రమే కావడంతో అందరూ ఊపిరి పీల్చుకున్నారు. స్థానికుల సమాచారం ప్రకారం రంగంలోకి దిగిన పోలీసులు, వైరల్ వీడియో ఆధారంగా ట్రక్కును గుర్తించి, బాధ్యుడైన డ్రైవర్‌ను వెంటనే అదుపులోకి తీసుకుని కేసు నమోదు చేశారు.

బాల్కసుమన్ అరెస్టుకు రంగం సిద్దం.. తెలంగాణ భవన్ వద్ద తీవ్ర ఉద్రిక్తత!