అయితే ఆ వయస్సు దాటిన తర్వాత కూడా ఈ అలవాటు కొనసాగితే తల్లిదండ్రులు జాగ్రత్త పడాలి. ఎక్కువకాలం బొటనవేలు చీకడం వల్ల దంతాల (పళ్లు) ఎదుగుదల, దవడ ఆకృతి దెబ్బతినే అవకాశం ఉంటుంది. అలాగే చేతులపై ఉండే క్రిములు శరీరంలోకి ప్రవేశించి ఇన్ఫెక్షన్లు వచ్చే ప్రమాదం కూడా పెరుగుతుంది.

పిల్లలు బొటనవేలు ఎందుకు చీకుతారు?

పుట్టిన ప్రతి శిశువులో సహజంగా చీకే ప్రతిచర్య ఉంటుంది. ఇది తల్లి పాలు తాగేందుకు సహాయపడుతుంది. బొటనవేలు చీకడం వల్ల కొందరు పిల్లలు తాము భద్రంగా ఉన్నట్లు భావిస్తారు. కొంతమంది పిల్లలు.. గర్భంలో ఉన్నప్పుడే ఈ అలవాటును ప్రారంభిస్తారని నిపుణులు చెబుతున్నారు. అయితే చాలా మంది పిల్లలు నిద్రపోయే సమయంలో లేదా అలసటగా ఉన్నప్పుడు బొటనవేలు చీకుతారు. మరికొందరు భయం, ఆందోళన లేదా ఒంటరితనం అనిపించినప్పుడు కూడా ఈ అలవాటును కొనసాగిస్తారు. కొంతకాలం తర్వాత అది రోజువారీ అలవాటుగా మారిపోతుంది.

తల్లిదండ్రులు ఎప్పుడు ఆందోళన చెందాలి?

రెండు నుంచి నాలుగేళ్ల మధ్య బొటనవేలు చీకడం సాధారణమని నిపుణులు అభిప్రాయపడుతున్నారు. అయితే నాలుగేళ్లు దాటిన తర్వాత కూడా అదే అలవాటు కొనసాగితే గమనించాలి. ఐదు లేదా ఆరు సంవత్సరాల వయస్సులో కూడా బొటనవేలు చీకితే శాశ్వత దంతాల అమరికపై ప్రభావం పడే అవకాశం ఉంది. దవడ ఎదుగుదల, మాటతీరు కూడా ప్రభావితమవవచ్చు. పలుమార్లు ప్రయత్నించినా అలవాటు మానకపోతే వైద్యుడిని సంప్రదించడం మంచిది.

పిల్లలను ఇతర కార్యకలాపాల్లో నిమగ్నం చేయండి

పిల్లలు ఎప్పుడు బొటనవేలు చీకుతున్నారో గమనించండి. టీవీ చూస్తున్నప్పుడు లేదా నిద్రపోయే సమయంలో ఈ అలవాటు ఎక్కువగా కనిపించవచ్చు. అలాంటి సమయంలో బొమ్మలు, డ్రాయింగ్, పజిల్స్ లేదా క్రాఫ్ట్ పనుల్లో వారిని నిమగ్నం చేయండి. నిద్రకు ముందు కథలు చెప్పడం కూడా మంచి మార్గం. ఇలా చేస్తే వారి దృష్టి మరలుతుంది.

మంచి పని చేస్తే ప్రశంసించాలి

పిల్లలు కొంతసేపు బొటనవేలు చీకకుండా ఉంటే వారిని అభినందించండి. చిన్నచిన్న బహుమతులు కూడా ఇస్తే వారిని ప్రోత్సహించినట్లు ఉంటుంది. ఇలా ప్రోత్సహిస్తే పిల్లలకు మంచి అలవాట్లు త్వరగా పెరుగుతాయి. ప్రశంసలు పిల్లల్లో ఆత్మవిశ్వాసాన్ని పెంచుతాయి.

ప్రేమగా చెప్పండి

పిల్లలు తెలియకుండానే బొటనవేలు నోట్లో పెట్టుకోవచ్చు. అలాంటి సమయంలో వారిపై కోపగించుకోవద్దు. నెమ్మదిగా గుర్తు చేసి పిల్లాడి నోటి నుంచి చేతిని తీసేయమని చెప్పండి. తరచూ మందలించడం లేదా అవమానించడం వల్ల పిల్లల్లో మొండితనం పెరిగే అవకాశం ఉంటుంది.

అలవాటు వల్ల వచ్చే సమస్యలు వివరించండి

పెద్ద పిల్లలకు ఈ అలవాటు వల్ల కలిగే నష్టాలను సులభంగా వివరించండి. బొటనవేలు చీకడం వల్ల దంతాలు సరిగా ఎదగకపోవచ్చని చెప్పండి. చేతులపై ఉండే క్రిముల వల్ల అనారోగ్యం రావచ్చని అర్థమయ్యేలా వివరించండి. ప్రేమగా చెప్పినప్పుడు పిల్లలు త్వరగా అర్థం చేసుకుంటారు.

అవసరమైతే వైద్యుడిని సంప్రదించండి

కొంతమంది పిల్లలు తల్లిదండ్రులు ఎంత ప్రయత్నించిన తర్వాత కూడా ఈ అలవాటు మానలేరు. అలాంటి పరిస్థితుల్లో పిల్లల వైద్యుడిని లేదా దంత వైద్యుడిని సంప్రదించండి. సరైన సలహా, చికిత్సతో ఈ అలవాటును సులభంగా తగ్గించవచ్చు.

ఓర్పుతో ప్రయత్నిస్తే ఫలితం ఉంటుంది

ఏ అలవాటు అయినా ఒక్కరోజులో మారదు. తల్లిదండ్రులు ఓర్పుతో, ప్రేమతో పిల్లలను ప్రోత్సహించాలి. నిరంతర ప్రోత్సాహం, సరైన మార్గనిర్దేశం ఉంటే చాలా మంది పిల్లలు ఈ అలవాటును క్రమంగా మానేస్తారు. మంచి అలవాట్లు చిన్నప్పుడే నేర్పితే వారి ఆరోగ్యం భవిష్యత్తులో మెరుగ్గా ఉంటుంది.