మాంసాహారం పూర్తిగా మానేస్తే ఆరోగ్యం, ఫిట్‌నెస్ నిజంగానే మెరుగుపడుతుందా అని తెలుసుకోవాలని ఆసక్తి పెరిగింది.

ఆరోగ్య నిపుణుల ప్రకారం.. దీనికి ఒకే సమాధానం ఉండదు. మీరు రోజూ తీసుకునే మొత్తం ఆహారం సమతుల్యంగా ఉంటేనే శరీరానికి ప్రయోజనం ఉంటుంది. కేవలం నాన్‌వెజ్ మానేయడం వల్ల మాత్రమే ఫిట్‌నెస్ పెరగదు.

వెజిటేరియన్ డైట్ తీసుకుంటే శరీరంలో వచ్చే మార్పులు

సరైన ప్రణాళికతో వెజిటేరియన్ ఆహారం తీసుకుంటే శరీరంలో కొన్ని మంచి మార్పులు కనిపించవచ్చు. అయితే అవి క్రమంగా మాత్రమే కనిపిస్తాయి.

జీర్ణక్రియ మెరుగుపడుతుంది

పండ్లు, కూరగాయలు, పప్పులు, తృణధాన్యాల్లో ఫైబర్ ఎక్కువగా ఉంటుంది. ఫైబర్ జీర్ణక్రియను మెరుగుపరుస్తుంది. మలబద్ధకం సమస్యను తగ్గించడంలో కూడా సహాయపడుతుంది. దీంతో కడుపు ఆరోగ్యంగా ఉంటుంది.

బరువు నియంత్రణలో ఉంటుంది

వెజిటేరియన్ ఆహారంలో సాధారణంగా ఫైబర్ ఎక్కువగా ఉంటుంది. ఇది ఎక్కువసేపు ఆకలి వేయకుండా చేస్తుంది. దీంతో అనవసరంగా ఎక్కువ తినే అవకాశం తగ్గుతుంది. సరైన ఆహారంతో బరువును నియంత్రించుకోవచ్చు.

గుండె ఆరోగ్యానికి మేలు చేస్తుంది

కొన్ని పరిశోధనల ప్రకారం.. వెజిటేరియన్ డైట్ చెడు కొలెస్ట్రాల్‌ను తగ్గించడంలో సహాయపడవచ్చు. అలాగే యాంటీఆక్సిడెంట్లు అధికంగా ఉండే ఆహారం గుండె ఆరోగ్యాన్ని కాపాడుతుంది. అయితే వ్యాయామం కూడా తప్పనిసరి.

శరీరానికి మంచి శక్తినిస్తుంది

సమతుల్యమైన వెజిటేరియన్ డైట్ ద్వారా కూడా కార్బోహైడ్రేట్లు, ప్రోటీన్లు, విటమిన్లు, ఖనిజాలు అందుతాయి. ఇవి రోజంతా శక్తినిస్తాయి. ఆరోగ్యం తేలికగా ఉన్న భావనను కూడా కలుగుతుంది.

చర్మం ఆరోగ్యంగా కనిపిస్తుంది

తాజా పండ్లు, కూరగాయల్లో విటమిన్లు, యాంటీఆక్సిడెంట్లు పుష్కలంగా ఉంటాయి. ఇవి చర్మాన్ని ఆరోగ్యంగా ఉంచడంలో సహాయపడతాయి. తగినంత నీరు తాగితే చర్మం మరింత తాజాగా కనిపిస్తుంది.

నాన్‌వెజ్ మానేస్తే మాత్రమే ఫిట్‌నెస్ పెరుగుతుందా?

దీనికి సమాధానం కాదు. కేవలం మాంసాహారం మానేయడం వల్ల ఫిట్‌నెస్ రాదు. దాని బదులు సమోసాలు, పకోడీలు, స్వీట్లు, కూల్ డ్రింక్స్ ఎక్కువగా తీసుకుంటే ఆరోగ్యం దెబ్బతింటుంది. మంచి ఫిట్‌నెస్ కోసం సమతుల్య ఆహారం, వ్యాయామం, మంచి నిద్ర, ఆరోగ్యకరమైన జీవనశైలి అవసరం.

వెజిటేరియన్ డైట్‌లో వచ్చే పోషక లోపాలు

సరైన ప్రణాళిక లేకుండా వెజిటేరియన్ డైట్ పాటిస్తే కొన్ని పోషకాల లోపం రావచ్చు.

విటమిన్ B12 లోపం

విటమిన్ B12 ఎక్కువగా మాంసాహారంలో లభిస్తుంది. అందువల్ల వెజిటేరియన్లలో దీని లోపం వచ్చే అవకాశం ఉంటుంది. అవసరమైతే వైద్యుల సూచనతో సప్లిమెంట్లు తీసుకోవాలి.

ఐరన్ లోపం

మొక్కల ద్వారా లభించే ఫుడ్‌లో ఐరన్‌ను శరీరం పూర్తిగా గ్రహించదు. ఐరన్ లోపం వల్ల అలసట, బలహీనత, రక్తహీనత వంటి సమస్యలు రావచ్చు. విటమిన్ సి ఉన్న ఆహారంతో కలిసి తీసుకుంటే ఐరన్ శోషణ మెరుగుపడుతుంది.

ప్రోటీన్ లోపం

కండరాల నిర్మాణానికి ప్రోటీన్ చాలా అవసరం. అందుకే పప్పులు, రాజ్మా, శనగలు, సోయా, టోఫు, పనీర్, మొలకలు వంటి ఆహారాన్ని ప్రతిరోజూ తీసుకోవాలి.

ఇతర పోషకాల లోపం

కొంతమందిలో ఒమేగా 3 ఫ్యాటీ యాసిడ్లు, జింక్, విటమిన్ డి వంటి పోషకాల లోపం కూడా రావచ్చు. అందుకే గింజలు, డ్రైఫ్రూట్స్, పాల ఉత్పత్తులను ఆహారంలో చేర్చాలి.

వెజిటేరియన్ డైట్‌లో తప్పనిసరిగా ఉండాల్సిన ఆహారాలు

రోజూ పప్పులు, రాజ్మా, శనగలు, సోయా చంక్స్, టోఫు, పనీర్, మొలకలు తీసుకోవాలి. పాలు, పెరుగు, మజ్జిగ వంటి పాల ఉత్పత్తులు కూడా ఉపయోగకరంగా ఉంటాయి. ఆకుకూరలు, సీజనల్ పండ్లు ప్రతిరోజూ తినాలి. బాదం, వాల్‌నట్స్, అవిసె గింజలు, చియా గింజలు వంటి ఆరోగ్యకరమైన కొవ్వులు కూడా ఆహారంలో ఉండాలి.

నాన్‌వెజ్ మానాలనుకుంటే ఈ సూచనలు పాటించండి

ఒక్కరోజులో పూర్తిగా మాంసాహారం మానేయకుండా క్రమంగా తగ్గించాలి. ప్రతి భోజనంలో ప్రోటీన్ ఉండేలా చూసుకోవాలి. రోజంతా తగినంత నీరు తాగాలి. ప్రతిరోజూ వ్యాయామం లేదా యోగా చేయాలి. అవసరమైతే డాక్టర్ సలహాతో మాత్రమే సప్లిమెంట్లు తీసుకోవాలి.

సెలబ్రిటీ డైట్‌ను అనుసరించడం సరైనదేనా?

సినీ నటుల డైట్‌ను వైద్యులు, పోషకాహార నిపుణులు, ఫిట్‌నెస్ ట్రైనర్లు కలిసి రూపొందిస్తారు. ప్రతి వ్యక్తి వయసు, బరువు, ఆరోగ్య పరిస్థితి, జీవనశైలి వేర్వేరుగా ఉంటాయి. అందువల్ల సెలబ్రిటీల డైట్‌ సాధారణ ప్రజలు గుడ్డిగా అనుసరించకూడదు. మీకు సరిపోయే ఆహార ప్రణాళిక కోసం పోషకాహార నిపుణుడు లేదా వైద్యుడిని సంప్రదించడం బెస్ట్.