ఎన్నో అంచనాల నడుమ విడుదలైన ఈ సినిమా థియేటర్లలో సూపర్ సక్సెస్ అందుకుంది. ఆగస్టు 21వ తేదీ విడుదలైన ఈ సినిమా కేవలం 10 రోజుల వ్యవధిలోనే ఏకంగా 200 కోట్ల గ్రాస్ కలెక్షన్లను రాబట్టి సంచలనాలను సృష్టించింది. ఈ విషయాన్ని తాజాగా చిత్ర నిర్మాతలు అధికారకంగా పోస్టర్ ద్వారా తెలియజేశారు.

200 కోట్లు కొల్లగొట్టిన ఇరుముడి..

ఈ సినిమా 200 కోట్ల కలెక్షన్లను రాబట్టిన నేపథ్యంలో అయ్యప్ప స్వామి గెటప్ లో మనెమ్మ కనిపించగా ఇరువైపులా రవితేజ ప్రియా భవాని శంకర్ నిలబడి ఉన్నటువంటి పోస్టర్ ను విడుదల చేస్తూ అన్ని థియేటర్లలో ఇరుముడి సంబరాలు కొనసాగుతున్నాయని, చిన్న పిల్లల నుంచి పెద్ద వాళ్ల దాకా అందరూ సినిమాను ఆదరిస్తున్నారనీ, ఇరుముడి జనరేషన్ బ్లాక్ బాస్టర్ సినిమా అంటూ మైత్రి మూవీ మేకర్స్ వారు పోస్టర్ విడుదల చేశారు. ఇలా ఈ సినిమా 200 కోట్ల క్లబ్ లోకి అడుగుపెట్టిన నేపథ్యంలో రవితేజ అభిమానులు కూడా ఎంతో సంతోషం వ్యక్తం చేస్తున్నారు.

రవితేజ కెరియర్ లోనే హైయెస్ట్ కలెక్షన్స్..

రవితేజ ఇప్పటివరకు సుమారు 70కి పైగా సినిమాలలో నటించారు అయితే తన సినీ కెరియర్ లోనే హైయెస్ట్ కలెక్షన్లను రాబట్టిన సినిమాగా ఇరుముడి నిలిచిపోతుందని చెప్పాలి. ఇటీవల కాలంలో రవితేజ నటించిన సినిమాలు వరుసగా ప్రేక్షకులను నిరాశ పరుస్తున్న సంగతి తెలిసిందే. ధమాకా సినిమాతో సక్సెస్ అందుకున్న రవితేజ అనంతరం ఒక అరడజనుకు పైగా సినిమాల ద్వారా ప్రేక్షకుల ముందుకు వచ్చారు. ప్రతి ఒక్క సినిమా కూడా నిరాశపరిచింది. ఇలా రవితేజ సినిమాల విషయంలో పూర్తిగా నిరాశలో ఉన్న అభిమానులకు ఇరుముడి అభిమానుల ఆకలిని తీర్చిందని చెప్పాలి.