Tata Motors vs Mahindra August Sales:దేశీయ కార్ల మార్కెట్లో టాటా మోటార్స్, మహీంద్రా అండ్ మహీంద్రా మధ్య పోటీ రోజురోజుకూ మరింతగా పెరుగుతోంది. ఆగస్టు 2026 అమ్మకాలు కూడా ఇదే విషయాన్ని వెల్లడిస్తున్నాయి.
ముఖ్యంగా టాటా మోటార్స్ గత నెలలో ఊహించని వృద్ధిని నమోదు చేసి అందరి దృష్టిని ఆకర్షించింది. పెట్రోల్, డీజిల్, సీఎన్జీతో పాటు ఎలక్ట్రిక్ వాహనాలకు ఉన్న డిమాండ్ కంపెనీ అమ్మకాలకు కలిసొచ్చింది.
భారీగా పెరిగిన టాటా సేల్స్
ఆగస్టు 2026లో టాటా మోటార్స్ దేశీయ మార్కెట్లో 65,253 ప్యాసింజర్ వెహికల్స్ ను అమ్మింది. గత ఏడాది ఆగస్టులో ఇదే సమయంలో 41,001 యూనిట్లు అమ్ముడయ్యాయి. దీంతో ఏడాది ప్రాతిపదికన టాటా దేశీయ అమ్మకాల్లో 59 శాతం వృద్ధిని నమోదు చేసింది. దేశీయ, అంతర్జాతీయ మార్కెట్లను కలిపి చూస్తే.. టాటా మోటార్స్ మొత్తం ప్యాసింజర్ వాహనాల అమ్మకాలు 67,753 యూనిట్లకు చేరాయి. 2025 ఆగస్టులో ఈ సంఖ్య 43,315 యూనిట్లుగా ఉంది. దీంతో మొత్తం అమ్మకాల్లోనూ కంపెనీ భారీ వృద్ధిని సాధించింది.
మహీంద్రా దూకుడు
మరోవైపు మహీంద్రా అండ్ మహీంద్రా కూడా ఆగస్టులో మంచి పనితీరు కనబరిచింది. కంపెనీ దేశీయ మార్కెట్లో 59,257 ఎస్యూవీలను అమ్మింది. గత ఏడాది ఆగస్టులో 39,399 యూనిట్లు అమ్ముడయ్యాయి. అంటే, ఏడాది వ్యవధిలో మహీంద్రా అమ్మకాలు సుమారు 50 శాతం పెరిగాయి. అమ్మకాల పరంగా టాటా, మహీంద్రా రెండూ భారీ వృద్ధిని నమోదు చేసినప్పటికీ.. ఆగస్టులో టాటా మోటార్స్ మొత్తం ప్యాసింజర్ వాహనాల అమ్మకాలు మహీంద్రా దేశీయ ఎస్యూవీ అమ్మకాల కంటే ఎక్కువగా ఉన్నాయి.
ఎలక్ట్రిక్ వాహనాలే బలం
టాటా మోటార్స్కు ఎలక్ట్రిక్ వాహనాల విభాగం కూడా కీలకంగా మారింది. ఆగస్టు 2026లో కంపెనీ మొత్తం 16,549 ఎలక్ట్రిక్ వాహనాలను విక్రయించింది. గత ఏడాది ఇదే నెలలో 8,540 యూనిట్లు మాత్రమే అమ్ముడయ్యాయి. దీంతో ఈ విభాగంలో దాదాపు 94 శాతం వృద్ధి నమోదైంది. పంచ్ ఈవీ, నెక్సాన్ ఈవీ, హారియర్ ఈవీ లాంటి మోడళ్లతో పాటు కొత్తగా వచ్చిన సియెర్రా ఈవీకి కూడా కొనుగోలుదారుల నుంచి మంచి స్పందన లభిస్తోందని కంపెనీ గణాంకాలు సూచిస్తున్నాయి.
సీఎన్జీ మోడళ్లకూ డిమాండ్
టాటా కార్లకు పెట్రోల్, డీజిల్తో పాటు సీఎన్జీ మోడళ్ల నుంచి కూడా మంచి డిమాండ్ ఉంది. ముఖ్యంగా పంచ్, నెక్సాన్ వంటి కార్లలో అందిస్తున్న ట్విన్-సిలిండర్ సీఎన్జీ టెక్నాలజీ వినియోగదారులను ఆకట్టుకుంటోంది. బూట్ స్పేస్ విషయంలో పెద్దగా రాజీ పడకుండా సీఎన్జీని ఎంచుకునే అవకాశం ఉండటం ఈ మోడళ్లకు ప్లస్గా మారింది.
పండుగ సీజన్ ప్రభావం
మరోవైపు 2026 పండుగ సీజన్కు ముందు డీలర్లు వాహనాల స్టాక్ను పెంచుకోవడం కూడా కంపెనీల హోల్సేల్ అమ్మకాలకు కలిసి వచ్చింది. రాబోయే నెలల్లో పండుగల సందర్భంగా కార్ల కొనుగోళ్లు మరింత పెరిగే అవకాశం ఉంది.