మొత్తం 984 అధ్యాపక, ఇతర కీలక పోస్టుల భర్తీకి సర్కారు గ్రీన్ సిగ్నల్ ఇవ్వడంతో నోటిఫికేషన్ల కోసం ఎదురుచూస్తున్న నిరుద్యోగుల్లో సరికొత్త ఉత్సాహం నెలకొంది. ఈ నిర్ణయం కేవలం ఉద్యోగాల భర్తీ మాత్రమే కాదు, నిరుద్యోగుల జీవితాల్లో ఒక కొత్త వెలుగును నింపే శుభపరిణామం.

ఇంటర్వ్యూలు రద్దు.. మెరిట్‌కే పట్టాభిషేకం!
ఈ నియామక ప్రక్రియలో ముఖ్యమంత్రి రేవంత్ రెడ్డి ఒక విప్లవాత్మకమైన మార్పునకు శ్రీకారం చుట్టారు. ఇప్పటివరకు ఉన్న సాంప్రదాయ ఇంటర్వ్యూ విధానాన్ని పూర్తిగా రద్దు చేస్తున్నట్లు ఆయన సంచలన ప్రకటన చేశారు. ఇకపై ఎలాంటి అవినీతి, పైఫార్సులకు తావులేకుండా, కేవలం రాతపరీక్షలో సాధించిన మార్కులు, అకడమిక్ మెరిట్ (విద్యా ప్రతిభ) ఆధారంగానే అభ్యర్థులను అత్యంత పారదర్శకంగా ఎంపిక చేయాలని అధికారులకు స్పష్టమైన ఆదేశాలు జారీ చేశారు. ఇప్పటికే గ్రూప్-1 వంటి అత్యున్నత స్థాయి పోస్టుల్లో ఇంటర్వ్యూలను రద్దు చేసి సరికొత్త చరిత్ర సృష్టించిన ప్రభుత్వం, ఇప్పుడు అదే పారదర్శక విధానాన్ని విశ్వవిద్యాలయాల నియామకాల్లోనూ అమలు చేస్తూ నిరుద్యోగుల నమ్మకాన్ని నిలబెట్టుకుంది.

ఏ ఏ వర్సిటీల్లో.. ఎన్ని ఖాళీలు?
వ్యవసాయ శాఖపై జరిగిన ఉన్నతస్థాయి సమీక్షా సమావేశంలో సీఎం తీసుకున్న ఈ నిర్ణయంతో మూడు ప్రముఖ వర్సిటీల్లో నియామకాల ప్రక్రియ వేగవంతం కానుంది. వాటి వివరాలు ఇలా ఉన్నాయి..

1.ఆచార్య జయశంకర్ తెలంగాణ రాష్ట్ర వ్యవసాయ విశ్వవిద్యాలయం (PJTSAU)లో, అసిస్టెంట్ ప్రొఫెసర్ పోస్టులు (త్వరలోనే కొత్త నోటిఫికేషన్), 550 ఉన్నాయి.
2. పీవీ నరసింహారావు తెలంగాణ పశువైద్య విశ్వవిద్యాలయం (PVNRTVU)లో, బ్యాక్‌లాగ్, కొత్త ఖాళీలు, 294 పోస్టులు ఉన్నాయి.
3. కొండా లక్ష్మణ్ తెలంగాణ రాష్ట్ర ఉద్యాన విశ్వవిద్యాలయం (SKLTSHU)లో, ప్రొఫెసర్ (17), అసోసియేట్ ప్రొఫెసర్ (44), అసిస్టెంట్ ప్రొఫెసర్ (79), మొత్తం 140 పోస్టులు ఉన్నాయి.

ఇప్పటికే ఉద్యాన విశ్వవిద్యాలయం విడుదల చేసిన నోటిఫికేషన్‌కు కూడా ఇంటర్వ్యూల మినహాయింపు నిబంధన వర్తిస్తుందని ప్రభుత్వం స్పష్టం చేసింది.

ప్రతిభావంతులకు వరం.. నిరుద్యోగుల హర్షం!
ప్రభుత్వం తీసుకున్న ఈ చారిత్రాత్మక నిర్ణయంపై రాష్ట్రవ్యాప్తంగా విద్యావేత్తలు, నిరుద్యోగ అభ్యర్థుల నుంచి హర్షాతిరేకాలు వ్యక్తమవుతున్నాయి. గతంలో ఇంటర్వ్యూల పేరుతో జరిగే వెనకడుగులు, లాబీయింగ్‌లకు ఈ నిర్ణయంతో శాశ్వతంగా చెక్ పడినట్లయింది. ముఖ్యంగా గ్రామీణ, పేద, మధ్యతరగతి నేపథ్యం నుండి వచ్చి, రాత్రింబవళ్లు కష్టపడి చదివే ప్రతిభావంతులైన అభ్యర్థులకు ఈ విధానం ఒక వరంగా మారనుంది. కేవలం తమ కష్టాన్ని, నాలెడ్జ్‌ను నమ్ముకున్న వారికే ఇప్పుడు ఉన్నత ఉద్యోగాలు దక్కే అవకాశం లభించడంతో నిరుద్యోగుల్లో ప్రభుత్వ నిర్ణయం పట్ల నమ్మకం రెట్టింపయింది.

త్వరలోనే సిలబస్, పరీక్షల షెడ్యూల్
ముఖ్యమంత్రి ఆదేశాల నేపథ్యంలో ఆయా విశ్వవిద్యాలయాల బోర్డులు నియామక ప్రక్రియను వేగవంతం చేయడానికి సన్నాహాలు ప్రారంభించాయి. ఇంటర్వ్యూలు లేకపోవడంతో రాతపరీక్ష అత్యంత కీలకం కానుంది. అందువల్ల, అభ్యర్థులు తమ ప్రిపరేషన్‌ను పక్కాగా ప్లాన్ చేసుకునేందుకు వీలుగా సంబంధిత వర్సిటీల బోర్డులు త్వరలోనే అధికారిక సిలబస్, పరీక్షల పూర్తి షెడ్యూల్‌ను విడుదల చేయనున్నాయి. ప్రభుత్వ తాజా నిర్ణయంతో ఎంతో కాలంగా వర్సిటీల్లో కొలువు సాధించాలనే పట్టుదలతో ఉన్న నిరుద్యోగులకు ఇదొక సువర్ణావకాశం. మరింకెందుకు ఆలస్యం, మీ ప్రిపరేషన్‌కు పదును పెట్టండి.. పారదర్శక కొలువును సొంతం చేసుకోండి