ఏపీకి అంతర్జాతీయ విమానాశ్రయం రావడం పట్ల ప్రజలు సంతోష పడుతున్నారు. ఈ ప్రాంత వ్యాపారంగంతో పాటు పర్యాటక రంగానికి కూడా బిగ్ బూస్టింగ్ వస్తుందని భావిస్తున్నాయి. అయితే, ఈ ఎయిర్‌ పోర్ట్‌ ను సామాన్యులు సైతం చూసేలా ప్రభుత్వం ఏర్పాట్లు చేసింది. సాధారణ ప్రజలు కూడా కొన్ని నిబంధనలు పాటిస్తూ విమానాశ్రయాన్ని సందర్శించే అవకాశం ఉంది. ఎలాగో ఇప్పుడు తెలుసుకునే ప్రయత్నం చేద్దాం..

భోగాపురం ఎయిర్ పోర్టుకు ఎలా వెళ్లాలంటే?

భోగాపురం విశాఖపట్నం-శ్రీకాకుళం జాతీయ రహదారి (NH-16)పై ఉండటంతో ఈజీగా వెళ్లే అవకాశం ఉంటుంది. విశాఖపట్నం నుంచి సుమారు 45 కిలోమీటర్లు, విజయనగరం నుంచి దాదాపు 25 కిలోమీటర్ల దూరంలో ఉంటుంది. ఆర్టీసీ బస్సులు, టాక్సీలు, క్యాబ్‌ లు, సొంత వాహనాల్లో సులభంగావెళ్లవచ్చు.

ఎయిర్ పోర్టులో ఏ ప్రదేశాలు చూడవచ్చు?

విమానాశ్రయానికి చేరుకున్న తర్వాత భద్రతా నిబంధనల కారణంగా ప్రయాణికులకు మాత్రమే అనుమతి ఉన్న ప్రాంతాల్లోకి సాధారణ సందర్శకులను అనుమతించరు. ముఖ్యంగా బోర్డింగ్ ఏరియా, సెక్యూరిటీ చెక్ తర్వాత ఉండే ప్రదేశాల్లోకి వెళ్లే అవకాశం ఉండదు. అయితే, బయట ఉన్న పబ్లిక్ పోర్టికో, డ్రాప్-ఆఫ్ జోన్, ల్యాండ్‌ స్కేపింగ్ గార్డెన్లు, విమానాశ్రయం వెలుపలి నిర్మాణం, ఆధునిక టెర్మినల్ డిజైన్‌ ను చూసి ఆస్వాదించవచ్చు. ఫోటోలు తీసుకోవడానికి కూడా కొన్ని ప్రాంతాల్లో అనుమతి ఉంటుంది. అయితే, భద్రతా సిబ్బంది సూచనలు తప్పనిసరిగా పాటించాలి.

విజిటర్ పాస్ తో మెయిన్ హాల్ వరకు వెళ్లే అవకాశం

కొన్ని సందర్భాల్లో విమానాశ్రయ మెయింటెనెన్స్ సంస్థలు విజిటర్ పాస్ లు ఇచ్చే అవకాశం ఉంది. వాటిని తీసుకుని టెర్మినల్‌ లోని మెయిన్ హాల్ వరకు వెళ్లే అవకాశం ఉంటుంది. అక్కడ లోపలి ఆర్కిటెక్చర్, విశాలమైన వెయిటింగ్ ఏరియాలు, కెఫేలు సహా పలు ఇతర సౌకర్యాలను కూడా చూడవచ్చు. అయితే, ఈ పాస్ అందుబాటులో ఉండటం పూర్తిగా విమానాశ్రయ నిబంధనలపై ఆధారపడి ఉంటుంది. విజిటర్ పాస్ తీసుకోవాలంటే ఆధార్ కార్డు, డ్రైవింగ్ లైసెన్స్, లేదంటే ప్రభుత్వం జారీ చేసిన ఏదైనా చెల్లుబాటు అయ్యే గుర్తింపు కార్డు వెంట తీసుకెళ్లడం మంచిది. ఆ తర్వాత అక్కడి అధికారులు సూచించే విధానాన్ని ఫాలో కావాలి. మరో ముఖ్యమైన విషయం ఏంటంటే, విమానాశ్రయం ప్రజలకు అందుబాటులో ఉండే సమయాలు, సందర్శకుల అనుమతి లాంటి విషయాలు మారే అవకాశం ఉంటుంది. అందుకే వెళ్లే ముందు పూర్తి సమాచారం తెలుసుకోవడం మంచిది.

మొత్తానికి, విమానం ఎక్కకపోయినా భోగాపురం అంతర్జాతీయ విమానాశ్రయాన్ని బయట నుంచి సందర్శించి అక్కడి ఆధునిక నిర్మాణాన్ని, అందమైన పరిసరాలను చూడవచ్చు. సరైన అనుమతులు ఉంటే టెర్మినల్‌ లోని కొన్ని లోపలి ప్రాంతాలను కూడా వీక్షించే అవకాశం ఉంటుంది. ఉత్తరాంధ్రలో కొత్తగా రూపుదిద్దుకున్న ఈ అంతర్జాతీయ విమానాశ్రయం పర్యాటకులకు కూడా ఆకర్షణీయమైన ప్రదేశంగా మారుతోంది.

నోట్: ప్రస్తుతం అందుబాటులో ఉన్న సమాచారం ప్రకారమే ఈ వివరాలు ఇచ్చాం. దయచేసి అక్కడికి వెళ్లే ముందు ఎయిర్ పోర్ట్ అధికారులను సంప్రదించి.. రూల్స్ గురించి తెలుసుకుని కన్ఫార్మ్ చేసుకోగలరు.

'భోగాపురం' అంటే ఏంటీ? ఆ పేరు ఎలా వచ్చింది? ఈ ఊరికి ఇంత చరిత్ర ఉందా?