వంటగదిలో మనం ప్రతిరోజూ ఉపయోగించే వస్తువుల్లో 'డిష్ వాష్ స్పాంజ్' (Dish Wash Sponge) ఒకటి. గిన్నెలకు ఉన్న జిడ్డు, మురికిని వదిలించి వాటిని శుభ్రంగా ఉంచే ఈ స్పాంజ్..

అసలు ఎంత శుభ్రంగా ఉందో ఎప్పుడైనా ఆలోచించారా?

పాడైపోయి, పీచులు ఊడిపోయే వరకు ఒకే స్పాంజ్‌ను నెలల తరబడి వాడుతున్నారా? అయితే మీరు పెద్ద ప్రమాదంలో పడ్డట్లే! నిజానికి మన ఇంట్లో టాయిలెట్ సీట్ కంటే కూడా గిన్నెలు తోమే స్పాంజ్‌లోనే కోట్లాది బ్యాక్టీరియా ఉంటాయని నిపుణులు హెచ్చరిస్తున్నారు.

స్పాంజ్ ఎందుకు అంత ప్రమాదకరం?
మనం గిన్నెలు తోమిన తర్వాత స్పాంజ్‌ను అలాగే ఉంచేస్తాం. అది ఎప్పుడూ తడిగా ఉండటం వల్ల, అందులో ఇరుక్కున్న ఆహారపు కణాలు బ్యాక్టీరియా, ఫంగస్ పెరగడానికి అద్భుతమైన వాతావరణాన్ని సృష్టిస్తాయి.

దీనివల్ల ఈ-కోలై (E.coli), సాల్మొనెల్లా వంటి ప్రమాదకరమైన బ్యాక్టీరియాలు వృద్ధి చెంది, ఫుడ్ పాయిజనింగ్, కడుపునొప్పి వంటి అనారోగ్య సమస్యలకు దారి తీస్తాయి.

ఎన్ని రోజులకు ఒకసారి మార్చాలి?
చాలామంది స్పాంజ్ చిరిగిపోయే వరకు వాడుతుంటారు. కానీ, ఆరోగ్య నిపుణుల ప్రకారం.. గిన్నెలు తోమే స్పాంజ్‌ను ప్రతి 10 నుండి 15 రోజులకు ఒకసారి (రెండు వారాలకు ఒకసారి) కచ్చితంగా మార్చేయాలి. ఒకవేళ మీ ఇంట్లో గిన్నెలు ఎక్కువగా ఉండి, స్పాంజ్ వాడకం ఎక్కువగా ఉంటే.. వారానికి ఒకసారి మార్చడం ఇంకా మంచిది.

ఈ లక్షణాలు కనిపిస్తే వెంటనే పారేయండి:
స్పాంజ్ నుండి వారం లోపే దుర్వాసన వస్తుంటే దాన్ని వెంటనే డస్ట్‌బిన్‌లో వేయండి.

స్పాంజ్ రంగు మారినా లేదా జిగటగా అనిపించినా వాడకూడదు.

ముక్కలు ముక్కలుగా విడిపోతున్నా సరే అది వాడకానికి పనికిరాదని అర్థం.

స్పాంజ్‌ను రోజూ ఎలా శుభ్రం చేయాలి?
కొత్త స్పాంజ్ తీసుకున్నంత మాత్రాన సరిపోదు, రోజూ గిన్నెలు తోమడం పూర్తయ్యాక స్పాంజ్‌ను వేడి నీటిలో బాగా ఉడికించి, నీరంతా పిండేసి గాలికి ఆరబెట్టాలి. ఇలా చేయడం వల్ల అందులోని బ్యాక్టీరియా చనిపోతుంది.