ఇరాన్ యుద్థ ప్రభావం ప్రపంచ వ్యాప్తంగా వివిధ దేశాలపై పడుతున్న నేపథ్యంలో ప్రముఖ నటుడు, రాజకీయ నాయకుడు కమల్ హాసన్‌ భారత పౌరులకు, ప్రభుత్వాలకు కొన్ని సలహాలు, సూచనలు చేశారు.

ఇరాన్ యుద్ధ ప్రభావం పట్ల తీవ్ర ఆందోళన చెందుతున్న ఈ సమయంలో ఒక భారతీయుడిగా తన మనసులోని మాటలను చెబుతున్నానని కమల్ హాసన్ (Kamal Haasan) అంటూ 'ప్రస్తుతం చమురు ధరలు పెరుగుతున్నాయి. సముద్ర వాణిజ్య మార్గాలు దిగ్బంధించబడ్డాయి. మన వంటగదులకు, ఇళ్లకు శక్తినిచ్చే ఇంధనం, మన పొలాలకు, పంటలకు పోషణనిచ్చే ఎరువులు, పరిశ్రమలను, వాహనాలను నడిపే ఇంధనం అన్నీ మరింత ఖరీదైనవిగా మారాయి. దీనికి ప్రతిస్పందనగా, 60కి పైగా దేశాలు ఇప్పటికే ఇంధన పొదుపు నిబంధనలను విధించాయి. రాబోయే కఠినమైన కాలానికి సిద్ధంగా ఉండమని సింగపూర్ ప్రధానమంత్రి తన ప్రజలను కోరడం మనం ఇటీవల విన్నాం. మనది చాలా పెద్ద దేశం, మన ప్రధానమంత్రి వచ్చే ఏడాది పాటు ఇంధనాన్ని ఆదా చేయమని మనల్ని కోరారు. శ్రీ వాజ్‌పేయి గతంలో చెప్పినట్లుగా, ప్రభుత్వాలు వస్తాయి పోతాయి, కానీ దేశం నిలిచి ఉంటుంది. 1962 చైనా యుద్ధ సమయంలో, సరిహద్దులో పోరాడుతున్న మన సైనికులకు మద్దతుగా మన ఇళ్లలోని బంగారాన్ని విరాళంగా ఇచ్చాం. 1965లో, భారతదేశంలో తగినంత ఆహార ధాన్యాలు లేనప్పుడు, లాల్ బహదూర్ శాస్త్రి గారు దేశం మొత్తం కోసం వారానికి ఒక పూట భోజనం మానేయమని పౌరులను కోరారు. ఈ రోజు, భారతదేశానికి అటువంటి త్యాగం అవసరం లేదు' అని తెలిపారు.

ఈ విషయమై ప్రస్తుతం చేయాల్సిన దాని గురించి చెబుతూ, 'మన పూర్వీకులు దేశం కోసం ఎంతో చేసినప్పుడు, మనం తప్పకుండా దేశం కోసం ఇది చేయాలి. ప్రధానమంత్రి మోదీ (Modi) నాయకత్వంలో, గత దశాబ్ద కాలంలో భారతదేశ సౌర, పవన శక్తి సామర్థ్యం పెరిగింది. బొగ్గు, గ్యాసిఫికేషన్, పునరుత్పాదక మరియు అణుశక్తి రంగాలలో ఇటీవలి పెట్టుబడులు ప్రోత్సాహాన్ని ఇస్తున్నాయి. అదే సమయంలో, త్యాగాన్ని కేవలం పౌరుల నుండి మాత్రమే ఆశించలేం. ప్రభుత్వాలు కూడా భారాన్ని పంచుకోవాలి. అందుకోసం ముఖ్యమంత్రులందరితో ఒక జాతీయ సదస్సును ఏర్పాటు చేయాలని నేను ప్రధానమంత్రి గారిని కోరుతున్నాను. సామాన్యుడిని ఆదుకోవడానికి కేంద్ర, రాష్ట్ర ప్రభుత్వాలు రెండూ కలిసి పనిచేయాలి మరియు వెంటనే రెండు పనులు చేయాలి. మొదటిది, పెట్రోల్, డీజిల్‌పై వ్యాట్ వంటి రాష్ట్ర పన్నులను తగ్గించాలి. పబ్లిక్ ట్రాన్స్ పోర్ట్ చార్జెజ్ ను తగ్గించాలి. దాని వలన ప్రైవేటు వెహికల్స్ వాడకాన్ని తగ్గించవచ్చు. ప్రతి యూనిట్ ఎనర్జీని, ప్రతి డ్రాప్ ఇంధనాన్ని ఈరోజు మనం సేవ్ చేయటం ద్వారా రేపటి భారత్ కు భారాన్ని తగ్గించిన వాళ్లం అవుతాం. జియో పాలిటిక్స్ అనేవి సామాన్యుడి జీవితాన్ని చిన్నాభిన్నం చేస్తున్న ఈ తరుణంలో అందరూ కలిసికట్టుగా ఈ పరిస్దితులను దాటి ఇండియాను బలమైన దేశంగా నిలబెడదాం' అని కమల్ హాసన్ భారత పౌరులను కోరారు.