'తండేల్' మూవీతో మరోసారి సక్సెస్‌ ట్రాక్‌లోకి వచ్చిన నాగ చైతన్య (Naga Chaitanya) ప్రస్తుతం మిథికల్‌ థ్రిల్లర్ 'వృషకర్మ' (Vrushakarma) లో నటిస్తున్నాడు.

తన తొలి బ్లాక్‌బస్టర్ 'విరూపాక్ష'తో ఆకట్టుకున్న ఫిల్మ్ మేకర్ కార్తీక్ దండుతో ఈ చిత్రాన్ని అత్యంత ప్రతిష్ఠాత్మకంగా తెరకెక్కిస్తున్నాడు. మీనాక్షి చౌదరి (Meenakshi Chaudhary) హీరోయిన్‌గా నటిస్తుండగా, స్పర్శ్ శ్రీవాస్తవ కీలక పాత్రలో కనిపించనున్నారు. ఎస్‌వీసీసీ, సుకుమార్ రైటింగ్స్ సంయుక్తంగా నిర్మిస్తున్న ఈ చిత్రాన్ని బాపినీడు సమర్పిస్తున్నారు. ఇప్పటికే విడుదలైన గ్లింప్స్ 20 మిలియన్ వ్యూస్ దాటి దేశవ్యాప్తంగా ఈ చిత్రంపై ఆసక్తి రేకెత్తించింది. ప్రస్తుతం 'వృషకర్మ' షూటింగ్ చివరి దశకు చేరుకుంది.

తాజాగా రాజస్థాన్‌లో జరిగిన భారీ షెడ్యూల్‌కు సంబంధించిన బీహైండ్ ది సీన్స్ స్టిల్స్‌ను మేకర్స్ విడుదల చేశారు. రాజభవనాలు, పురాతన శిల్పకళతో అలరారుతున్న లొకేషన్స్‌లో చిత్రీకరించిన కీలక సన్నివేశాలు సినిమాకి ఉన్న భారీ విజువల్ స్కేల్‌ను చూపిస్తున్నాయి. ప్రధాన నటీనటులంతా పాల్గొన్న ఈ షెడ్యూల్ కథలో కీలకంగా ఉండబోతుంది.

ఈ స్టిల్స్ ద్వారా సినిమాకి ఉన్న మిస్టిక్ టోన్, గ్రాండియర్ మరింత స్పష్టమవుతోంది. షూటింగ్ ముగింపు దశకు చేరుకోవడంతో పోస్ట్ ప్రొడక్షన్ పనులు కూడా శరవేగంగా జరుగుతున్నాయి. భారీ స్థాయిలో సిజీఐ, అత్యాధునిక విజువల్ ఎఫెక్ట్స్ ఉపయోగిస్తూ భారతీయ ప్రేక్షకులకు ఎప్పుడూ చూడని సినీ అనుభూతిని అందించేందుకు టీమ్ పని చేస్తోంది. మిస్టికల్ ఎలిమెంట్స్‌ను రిచ్ డీటైలింగ్‌తో, ఇమర్సివ్ వరల్డ్ బిల్డింగ్‌తో అద్భుతంగా తెరపై ఆవిష్కరించబోతున్నారు. 'వృషకర్మ' చిత్రానికి టాప్ టెక్నికల్ టీమ్ పని చేస్తోంది. సినిమాటోగ్రాఫర్ రాగుల్ డి హెరియన్ అద్భుతమైన విజువల్ స్టైల్‌ను అందిస్తుండగా, అజనీష్ బి లోక్‌నాథ్ సంగీతం సమకూరుస్తున్నారు. ప్రొడక్షన్ డిజైనర్ శ్రీనాగేంద్ర తంగాల ఈ చిత్రంలోని మిస్టిక్ ప్రపంచాన్ని అద్భుతంగా తీర్చిదిద్దు తున్నారు. ఈ చిత్రానికి నవీన్ నూలి ఎడిటర్.