చమురు దిగుమతులను తగ్గించుకోవడానికి కార్బన్ ఉద్గారాలను తగ్గించడానికి మరియు దేశీయ వ్యవసాయ రంగానికి మద్దతు ఇవ్వడానికి భారతదేశం ఇప్పటికే పెట్రోల్‌లో 20 శాతం ఎథనాల్‌ను కలపడం (దీనినే E20 ఇంధనం అంటారు) అనే లక్ష్యాన్ని సాధించింది. ఈ నేపథ్యంలో E20 పెట్రోల్ వల్ల వాహనాలకు నష్టం వాటిల్లుతుందనే వాదనలను ఆయన తోసిపుచ్చారు.

E20 పెట్రోల్ కారణంగా ఏ కారైనా సమస్యలను ఎదుర్కొన్నట్లు ఒక్క కేసు కూడా లేదు. దేశంలో E20 పెట్రోల్ వాడకం వల్ల ఇబ్బంది పడిన కారు ఏదైనా ఉందా? ఉంటే ఒక్కదాని పేరు చెప్పండి అని అన్నారు. ఇథనాల్ మిశ్రమ ఇంధనం గురించి తప్పుడు సమాచారాన్ని వ్యాప్తి చేస్తున్నారని రహదారి రవాణా, రహదారుల శాఖ మంత్రి ఆరోపించారు. ఎక్కువ ఎథనాల్ కలిపిన పెట్రోల్ రోల్‌అవుట్ గురించి తప్పుడు ప్రచారాలు జరుగుతున్నాయి. ఇవన్నీ పెయిడ్ క్యాంపెయిన్‌లు (డబ్బులిచ్చి చేయిస్తున్న ప్రచారాలు) అని అన్నారు.

ప్రభుత్వ ఎథనాల్-బ్లెండింగ్ కార్యక్రమంలో భాగంగా పెట్రోల్‌తో ఎథనాల్‌ను మిక్స్ చేస్తారు. ఈ ఎథనాల్‌ను చెరకు, మొక్కజొన్న మరియు బియ్యం వంటి పంటల నుండి ఉపయోగిస్తారు.ఈ విధానాన్ని సమర్థించేవారు.. దీనివల్ల భారతదేశానికి ముడి చమురు దిగుమతులపై ఆధారపడటం తగ్గుతుందని, ఉద్గారాలు తగ్గుతాయని మరియు రైతులకు అదనపు ఆదాయ వనరు లభిస్తుందని వాదిస్తున్నారు.

అయితే విమర్శకులు మాత్రం దీనివల్ల మైలేజ్ తగ్గుతుందని మరియు మొదట్లో ఎక్కువ ఎథనాల్ మిశ్రమాలతో నడవడానికి రూపొందించని పాత వాహనాలకు ఇది సరిపడకపోవచ్చని ఆందోళన వ్యక్తం చేస్తున్నారు. బ్రెజిల్ వంటి దేశాలలో వాహనదారులు తమకు నచ్చిన ఎథనాల్-పెట్రోల్ మిశ్రమాన్ని ఎంచుకునే అవకాశం ఇంధన స్టేషన్లలో ఉంటుంది, కానీ ప్రస్తుతం భారతీయ వినియోగదారులకు ఆ అవకాశం లేదు. దేశవ్యాప్తంగా E20 ఇంధనమే ప్రామాణిక పెట్రోల్‌గా అందుబాటులోకి వచ్చింది.

భారతదేశ ఎథనాల్ బ్లెండింగ్ కార్యక్రమంపై ఇటీవల మళ్లీ చర్చ మొదలైంది. మైలేజ్ (ఇంధన సామర్థ్యం) తగ్గడం, పాత వాహనాలకు ఇది సరిపోతుందా లేదా అనే ఆందోళనలు వ్యక్తమవుతున్న నేపథ్యంలో కేంద్రమంత్రి నితిన్ గడ్కరీ కీలక కామెంట్స్ చేశారు.