భారతదేశ రక్షణ మరియు సాంకేతిక చరిత్రలో అత్యంత కీలకమైన ఘట్టం, దేశ తొలి అణు పరీక్ష 'స్మైలింగ్ బుద్ధా' (Smiling Buddha) విజయవంతమై నేటికి 52 ఏళ్లు పూర్తయింది.

ఈ చారిత్రాత్మక సందర్భాన్ని పురస్కరించుకుని కాంగ్రెస్ జాతీయ అధ్యక్షుడు మల్లికార్జున ఖర్గే ఆనాటి జ్ఞాపకాలను గుర్తుచేసుకున్నారు. దేశ సార్వభౌమాధికారాన్ని ప్రపంచానికి చాటిచెప్పిన ఆ అద్భుత క్షణాలను ఆయన కొనియాడారు.

భారతదేశాన్ని అణు రంగంలో స్వయంసమృద్ధి గల దేశంగా మార్చడంలో మన శాస్త్రవేత్తలు పోషించిన పాత్రను ఖర్గే ప్రత్యేకంగా ప్రస్తావించారు. మన శాస్త్రవేత్తల అద్భుత ప్రతిభ, అంకితభావం వల్లే దేశ స్వావలంబన, వ్యూహాత్మక సంకల్ప ప్రయాణంలో ఈ కీలక మైలురాయి సాధ్యమైంది. నాటి ప్రధాని ఇందిరా గాంధీ దృఢ సంకల్పం, శాస్త్రవేత్తల శ్రమ దేశ గమనాన్ని మార్చేశాయి అని ఖర్గే పేర్కొన్నారు.

1974 మే 18న రాజస్థాన్‌లోని పోఖ్రాన్ ఎడారి వేదికగా భారత్ ఈ రహస్య అణు పరీక్షను అత్యంత విజయవంతంగా నిర్వహించింది. బుద్ధ పూర్ణిమ రోజున ఈ పరీక్ష జరగడం, ఇది పూర్తిగా శాంతిభద్రతల పరిరక్షణ కోసమే ఉద్దేశించినది కావడంతో ఈ ప్రాజెక్టుకు 'స్మైలింగ్ బుద్ధా' (నవ్వుతున్న బుద్ధుడు) అని నామకరణం చేశారు. ఈ పరీక్షతో ఐక్యరాజ్యసమితి భద్రతా మండలిలోని ఐదు శాశ్వత సభ్యదేశాలు (P5) కాకుండా, అణు సామర్థ్యాన్ని నిరూపించుకున్న మొదటి దేశంగా భారత్ ప్రపంచ పటంలో నిలిచింది.