ఊబకాయం (Obesity) సమస్యతో బాధపడుతున్న వారికి ఒక శుభవార్త. ప్రస్తుతం ఇంజెక్షన్ రూపంలో అందుబాటులో ఉన్న ప్రముఖ బరువు తగ్గించే మందు 'వెగోవీ' (Wegovy), ఇప్పుడు మాత్రల (Pills) రూపంలో కూడా అద్భుతమైన ఫలితాలను ఇస్తున్నట్లు తాజా క్లినికల్ ట్రయల్స్ వెల్లడించాయి.

కొత్తగా నిర్వహించిన ఈ పరిశోధనల్లో, వెగోవీ మాత్రలను క్రమం తప్పకుండా వాడిన వారు తమ శరీర బరువులో 21.6 శాతం వరకు తగ్గినట్లు గుర్తించారు.ఇప్పటివరకు ఈ మందును వారానికి ఒకసారి ఇంజెక్షన్ ద్వారా తీసుకోవాల్సి వచ్చేది. అయితే, రోజువారీ తీసుకునే మాత్రల రూపంలో ఇది అందుబాటులోకి వస్తే, ఇంజెక్షన్ల పట్ల భయం ఉన్నవారికి ఇది పెద్ద ఊరట కానుంది.

ఈ మాత్ర శరీరంలోని ఆకలిని నియంత్రించడమే కాకుండా, తిన్న ఆహారం త్వరగా జీర్ణం కాకుండా చూస్తూ కడుపు నిండుగా ఉన్న అనుభూతిని కలిగిస్తుంది.నోవో నార్డిస్క్ (Novo Nordisk) సంస్థ నిర్వహించిన ఈ ట్రయల్స్‌లో పాల్గొన్న వ్యక్తులు కేవలం ఆహార నియంత్రణ మరియు వ్యాయామంతో పోలిస్తే, ఈ మాత్ర వాడకం వల్ల అత్యంత వేగంగా మరియు గణనీయంగా బరువు తగ్గారని పరిశోధకులు తెలిపారు.

ఏదైనా మందు లాగే, దీనివల్ల కూడా కొన్ని సాధారణ సమస్యలు ఉన్నట్లు గుర్తించారు. కొంతమందిలో వికారం , వాంతులు మరియు విరేచనాలు వంటి జీర్ణక్రియ సంబంధిత ఇబ్బందులు కనిపించాయి. అయితే, ఇవి స్వల్ప కాలం మాత్రమే ఉండి, తర్వాత క్రమంగా తగ్గిపోయాయని నివేదిక పేర్కొంది.

ఈ మందు ఇంకా పూర్తిస్థాయిలో మార్కెట్లోకి అందుబాటులోకి రావాల్సి ఉంది. బరువు తగ్గించే మందులను వాడే ముందు తప్పనిసరిగా డాక్టర్ సలహా తీసుకోవాలని నిపుణులు హెచ్చరిస్తున్నారు.