విడుదల ఎప్పుడు ఉంటుందో కానీ కల్కి 2 మీద అంచనాలు మాములుగా లేవు. కల్కి 2898 ఏడి గొప్ప విజయమే సాధించింది కానీ అందులో పాత్రల పరంగా ఉన్న కన్ఫ్యూజన్ చాలా మంచి ప్రేక్షకుల్లో అలా ఉండిపోయింది.

ఎవరికి ఎవరు ఏమవుతారు, ఎందుకు హఠాత్తుగా వచ్చి వెళ్లిపోయారు లాంటి క్వశ్చన్లకు సమాధానాలు దొరకాల్సి ఉంది. దర్శకుడు నాగ్ అశ్విన్ వాటికి ముందుగానే సమాధానాలు చెప్పేందుకు రెడీ అవుతున్నారట. అది కూడా వెరైటీ స్ట్రాటజీతో.

దాని ప్రకారం కల్కి 2లోని ముఖ్యమైన క్యారెక్టర్ల వెనుక బ్యాక్ స్టోరీస్ ని ఒక గంట నిడివి ఉన్న చిన్న సినిమాలుగా తీసి ముందు ఓటిటిలో రిలీజ్ చేస్తారట. అంటే కల్కి ప్రపంచాన్ని సులభంగా అర్థం చేసుకోవడానికి ఇవి ఉపయోగపడతాయి. దుల్కర్ సల్మాన్, మృణాల్ ఠాకూర్, విజయ్ దేవరకొండ తదితరులు పోషించిన పాత్రలకు సంబంధించిన నేపధ్యాన్ని వీటిలో చూపిస్తారు. అలాని డాక్యుమెంటరీలా కాదంట. ఒక్కో భాగానికి ఇరవై కోట్ల దాకా ఖర్చు కావొచ్చని సమాచారం.

దీని వల్ల ప్రయోజనాలు, ఇబ్బందులు సమానంగా ఉంటాయి. ఎందుకంటే ఒక సినిమాని పరిచయం చేయడం కోసం ఓటిటి సినిమాలు తీయడం జనం ఏ మేరకు రిసీవ్ చేసుకుంటారనేది వేచి చూడాలి. వీటి వల్ల అసలు కల్కి 2 ఆలస్యమైతే అభిమానులతో తలనొప్పి. పైగా ఎన్ని ఎపిసోడ్లు చేసినా వాటిలో ప్రభాస్ లేకపోతే అదో చిక్కు. ఉంటాడో లేదో తెలియదు. ఇలాంటి బోలెడు క్యాలికులేషన్లు ముడిపడి ఉంటాయి. నాగ్ అశ్విన్ ఇవన్నీ లెక్కలు వేసుకునే ఉంటారు.

కల్కి 2కున్న అతి పెద్ద సానుకూలాంశం రిలీజ్ ఒత్తిడి లేకపోవడం. ముందు ఫౌజీ రావాలి. ఆ తర్వాత స్పిరిట్ ఉంది. 2027 వీటికి అయిపోతుంది. 2028లో కల్కి 2 విడుదల ప్లాన్ చేసుకోవచ్చు. సో కావాల్సినంత సమయం ఉంది కనక దాన్ని సరైన రీతిలో వాడుకోవాలి. ప్రభాస్ మళ్ళీ సలార్ 2లోకి అడుగు పెట్టేముందే నాగ్ అశ్విన్ గుమ్మడికాయ కొట్టించేయాలి. మొదటి భాగం కన్నా దాదాపు రెట్టింపు బడ్జెట్ కల్కి 2కి అవుతోందని ఇన్ సైడ్ టాక్. ఎంతనేది దత్తుగారి ఫ్యామిలీ బయటికి చెప్పడం లేదు.