ఎన్టీఆర్ కొత్త సినిమా గ్లింప్స్ రాకముందు వరకు అందరి మైండ్ లో ఒకటే ఫిక్స్ అయి ఉంది. సినిమా టైటిల్ తో పాటే హీరో పేరు కూడా డ్రాగన్ అనుకున్నారు. కానీ నిన్న రాత్రి వచ్చిన వీడియో చూశాక లెక్కలు పూర్తిగా మారిపోయాయి.

ఇందులో తారక్ పాత్ర పేరు లుగర్ అని డైరెక్టర్ ప్రశాంత్ నీల్ క్లారిటీ ఇచ్చేశాడు. దీంతో అసలు డ్రాగన్ అంటే ఏంటి, ఆ పేరుకు వెనుక ఉన్న మిస్టరీ ఏంటనే కొత్త చర్చ మొదలైంది.

వీడియోలో చూపించిన ప్రపంచం బట్టి ఒక థియరీ గట్టిగా వినిపిస్తోంది. కథ మొత్తం ఓపియం మాఫియా చుట్టూ తిరుగుతుందని అర్థమైంది. ఈ మాదకద్రవ్యాల గ్లోబల్ నెట్ వర్క్ ను సింబాలిక్ గా డ్రాగన్ అని పిలుస్తారేమో అన్న అనుమానాలు వస్తున్నాయి. గోల్డెన్ ట్రేడింగ్ కంపెనీ, ఆఫ్ఘన్ ట్రేడింగ్ కంపెనీ లాంటి వాటన్నింటికీ బాస్ గా వ్యవహరించే ఒక పెద్ద సిండికేట్ పేరు డ్రాగన్ కావొచ్చు. దాన్ని అంతం చేయడమే హీరో టార్గెట్ అయ్యుండొచ్చు.

మరో కోణంలో ఆలోచిస్తే, డ్రాగన్ అనేది ఎన్టీఆర్ మరో పవర్ఫుల్ క్యారెక్టర్ కావొచ్చని కూడా ఫ్యాన్స్ అంచనా వేస్తున్నారు. అంటే డబుల్ రోల్ అనేలా. లుగర్ ఆఫ్ఘన్ కంపెనీకి అసాస్సిన్ ఇన్ చీఫ్ గా పని చేస్తున్నాడు కదా. అంటే ఆ కంపెనీకి పైన, ప్రపంచ దేశాలను కంట్రోల్ చేసే ఒక అన్ సీన్ క్యారెక్టర్ ఉండి ఉంటాడు. అతన్నే డ్రాగన్ అని పిలిచే ఛాన్స్ ఉంది. ఒకవేళ అదే నిజమైతే, డబుల్ యాక్షన్ లో ఆ క్లాష్ మామూలుగా ఉండదు.

ఇవేవి కాకుండా మరో ఆసక్తికరమైన పాయింట్ కూడా నెట్టింట వైరల్ అవుతోంది. ప్రశాంత్ నీల్ సినిమాల్లో హీరో ప్రయాణం ఎప్పుడూ ఒక సామాన్యుడిగా మొదలై ఒక రాక్షసుడిగా మారుతుంది. ఇక్కడ కూడా లుగర్ మొదట్లో ఒక కిల్లర్ గా మాత్రమే పరిచయం అవుతాడేమో. ఆ తర్వాత తన శత్రువులను ఎదుర్కొనే క్రమంలో తనే ఒక పెద్ద డ్రాగన్ గా మారతాడనే లాజిక్ కూడా బాగానే కనెక్ట్ అవుతోంది.