ఐపీఎల్ 2026లో భాగంగా రాజస్థాన్ రాయల్స్‌తో జరిగిన మ్యాచ్‌లో ముంబై పరాజయం పాలైనప్పటికీ, ప్రత్యర్థి జట్టులోని 15 ఏళ్ల యువ సంచలనం వైభవ్ సూర్యవంశీని హార్దిక్ అభినందించిన తీరు అందరినీ ఆకట్టుకుంది. మ్యాచ్ ముగిసిన తర్వాత మైదానంలో ఆ కుర్రాడిని దగ్గరకు పిలిచి, భుజం తట్టి ప్రోత్సహించడం సోషల్ మీడియాలో వైరల్‌గా మారింది. ఒక స్టార్ ఆటగాడిగా, ప్రత్యర్థి జట్టులోని వర్ధమాన క్రీడాకారుడి ప్రతిభను గుర్తించి గౌరవించడం హార్దిక్ వ్యక్తిత్వానికి అద్దం పడుతోంది.

బుమ్రా బౌలింగ్‌లో సిక్సర్లు

ఈ మ్యాచ్‌లో రాజస్థాన్ రాయల్స్ యువ ఆటగాడు వైభవ్ సూర్యవంశీ విధ్వంసకర బ్యాటింగ్‌తో చెలరేగిపోయాడు. కేవలం 14 బంతుల్లోనే 39 పరుగులు చేసి అందరినీ ఆశ్చర్యపరిచాడు. ముఖ్యంగా ప్రపంచ అత్యుత్తమ బౌలర్లలో ఒకరైన జస్ప్రీత్ బుమ్రా బౌలింగ్‌లో భయం లేకుండా రెండు భారీ సిక్సర్లు బాదడం ఈ మ్యాచ్‌కే హైలైట్‌గా నిలిచింది. 15 ఏళ్ల అతి చిన్న వయసులోనే అంతర్జాతీయ స్థాయి బౌలర్లను ఎదుర్కోవడంలో వైభవ్ చూపిన ఆత్మవిశ్వాసం, ముంబై ఇండియన్స్ వ్యూహాలను సైతం చిత్తు చేసింది. రాజస్థాన్ హ్యాట్రిక్ విజయం సాధించడంలో ఈ బుడ్డోడి ఇన్నింగ్స్ కీలక పాత్ర పోషించింది.

హార్దిక్ పాండ్య ప్రశంసలు

వైభవ్ ఆటతీరుపై హార్దిక్ పాండ్య ప్రశంసలు కురిపిస్తూ.. అతని భవిష్యత్తుపై ధీమా వ్యక్తం చేశాడు. “ఈ వయసులో వైభవ్ చూపిస్తున్న పరిణతి అద్భుతమని, తమ జట్టు ముందే అతని గురించి చర్చించుకుందని” హార్దిక్ పేర్కొన్నాడు. కేవలం ఆటలోనే కాకుండా, యువతను ప్రోత్సహించడంలో హార్దిక్ చూపిన చొరవపై నెటిజన్లు ప్రశంసలు కురిపిస్తున్నారు. ఒక కెప్టెన్‌గా తన జట్టు ఓడిపోయిన బాధను పక్కన పెట్టి, భారత క్రికెట్ భవిష్యత్తు ఆశాకిరణాన్ని వెన్నుతట్టి ప్రోత్సహించడం నిజమైన క్రీడాకారుడి లక్షణమని క్రీడాభిమానులు కొనియాడుతున్నారు.