Allu Arjun Raaka: ఐకాన్ స్టార్ అల్లు అర్జున్ పుట్టినరోజు సందర్భంగా విడుదలైన 'రాకా' ఫస్ట్ లుక్ సోషల్ మీడియాను ఊపేస్తోంది. గుండు, కళ్లకు కాటుక, చేతికి జంతువుల గోర్లు..

ఇలా మునుపెన్నడూ చూడని ఊర మాస్ అవతారంలో బన్నీ కనిపిస్తుండటంతో ఈ సినిమాపై అంచనాలు భారీగా పెరిగిపోయాయి. తాజాగా ఈ చిత్రానికి 'రాకా' అనే టైటిల్‌ను ఎందుకు ఖరారు చేశారో మేకర్స్ వెల్లడించారు.

'పుష్ప' సెంటిమెంట్‌ను ఫాలో అవుతూ..

అల్లు అర్జున్ కెరీర్‌లో 'పుష్ప' ఒక మైలురాయి. ఆ సినిమాలో 'పుష్పరాజ్' అనే పాత్ర పేరు సినిమా టైటిల్‌గా మారి దేశవ్యాప్తంగా ఒక ప్రభంజనం సృష్టించింది. అందుకే దర్శకుడు అట్లీ, అల్లు అర్జున్ పాత్ర పేరునే సినిమా టైటిల్‌గా పెట్టాలని నిర్ణయించుకున్నట్లు ఇండస్ట్రీ వర్గాల సమాచారం.

సాధారణంగా సినిమాలకు కథను బట్టి పేర్లు పెడుతుంటారు. కానీ 'రాకా' విషయంలో అల్లు అర్జున్ క్యారెక్టరైజేషన్, ఆయన స్క్రీన్ ప్రెజెన్స్‌నే సినిమా బ్రాండ్‌గా మార్చాలని మేకర్స్ భావిస్తున్నారు. పుష్పరాజ్ లాగే 'రాకా' కూడా దేశవ్యాప్తంగా ఒక ఎమోషన్ అవుతుందని చిత్ర బృందం నమ్ముతోంది. ఫస్ట్ లుక్ పోస్టర్‌లో అల్లు అర్జున్ నుదుటిపై కనిపిస్తున్న గుర్తులు 'వైకింగ్' టాటూలను పోలి ఉండటం చూస్తుంటే, ఇది ఒక ఇంటెన్స్ యాక్షన్ థ్రిల్లర్ అని అర్థమవుతోంది.

18 ఏళ్ల నిరీక్షణ.. అట్లీ ఎమోషనల్ పోస్ట్

ఈ ప్రాజెక్ట్ గురించి దర్శకుడు అట్లీ సోషల్ మీడియాలో ఆసక్తికర వ్యాఖ్యలు చేశారు. "రాకా అనేది కేవలం ఒక సినిమా మాత్రమే కాదు.. 18 ఏళ్లుగా నా గుండెల్లో దాచుకున్న ఒక ఆలోచన. ఎన్నో సవాళ్లు ఎదురైనా ఆ కథను ఎక్కడా వదిలిపెట్టలేదు. ఈ సినిమా నా జీవితంలో ఒక భాగం. ఇది కేవలం ఆరంభం మాత్రమే" అంటూ అట్లీ రాసుకొచ్చారు. ఈ చిత్రంలో అల్లు అర్జున్ సరసన బాలీవుడ్ స్టార్ బ్యూటీ దీపికా పదుకొణె నటిస్తుండటం విశేషం.

సన్ పిక్చర్స్ నిర్మిస్తున్న ఈ చిత్రానికి సాయి అభ్యంకర్ సంగీతాన్ని అందిస్తున్నారు. ఇండియన్ సినిమా స్థాయిని ప్రపంచ వేదికపై నిలబెట్టేలా ఈ చిత్రాన్ని తెరకెక్కిస్తున్నట్లు నిర్మాణ సంస్థ ప్రకటించింది. ఇప్పటికే 'పుష్ప 2: ది రూల్' తో బాక్సాఫీస్ వద్ద ఆల్ టైమ్ రికార్డులు సృష్టించిన అల్లు అర్జున్.. ఇప్పుడు 'రాకా'తో గ్లోబల్ మార్కెట్‌పై కన్నేశారు.

షారుఖ్ ఖాన్ ప్రశంసలు

అట్లీ దర్శకత్వంలో 'జవాన్' వంటి భారీ హిట్ అందుకున్న బాలీవుడ్ బాద్షా షారుఖ్ ఖాన్ కూడా 'రాకా' ఫస్ట్ లుక్‌పై స్పందించారు. "రాకా ఫస్ట్ లుక్ అద్భుతంగా ఉంది. అల్లు అర్జున్ నీ స్టైలే వేరు. ఈ సినిమా కోసం నేను కూడా ఎంతో ఆసక్తిగా ఎదురుచూస్తున్నాను" అని షారుఖ్ ట్వీట్ చేయడంతో ఈ సినిమాపై హిందీ బెల్ట్‌లోనూ విపరీతమైన బజ్ ఏర్పడింది.