Cancer Survivor: ప్రముఖ నటి రాజశ్రీ దేశ్‌పాండే తన జీవితంలోని అత్యంత క్లిష్టమైన పోరాటం గురించి మొదటిసారిగా స్పందించారు. బ్రెస్ట్ క్యాన్సర్ (రొమ్ము క్యాన్సర్) బారి నుండి కోలుకున్న ఆమె..

ఆ పోరాటంలో మిగిలిన గాయాలను చూసి తాను ఏమాత్రం కుంగిపోవడం లేదని స్పష్టం చేశారు. ఈ మేరకు ఆమె సోషల్ మీడియాలో పెట్టిన పోస్ట్ ప్రస్తుతం నెట్టింట వైరల్ అవుతోంది. తన సినిమా ప్రమోషన్లలో బిజీగా ఉన్న రాజశ్రీ.. క్యాన్సర్ సర్వైవర్‌గా తన అనుభవాలను పంచుకుంటూ ఇతర మహిళల్లో ధైర్యాన్ని నింపే ప్రయత్నం చేశారు.

ఈ గాయాలే నా మనుగడకు సాక్ష్యాలు

"నా శరీరంపై ఉన్న ప్రతి గాయం నా మనుగడకు సంబంధించిన కథను చెబుతుంది. నేను పోరాడానని, ప్రాణాపాయం నుండి బయటపడ్డానని, విజయం సాధించానని గుర్తుచేసే సాక్ష్యాలే ఈ గాయాలు" అని రాజశ్రీ ఎంతో గర్వంగా ప్రకటించారు.

సాధారణంగా క్యాన్సర్ వంటి మహమ్మారి బారిన పడి కోలుకున్న తర్వాత చాలామంది తమ శరీరంలో వచ్చే మార్పులను చూసి ఆందోళన చెందుతారు. కానీ రాజశ్రీ మాత్రం ఆ మార్పులను తన విజయానికి చిహ్నాలుగా చూస్తున్నారు.

ధైర్యమే కిరీటం

రొమ్ము క్యాన్సర్ తన శరీరంపై ముద్ర వేసి ఉండవచ్చు కానీ, అది తన ధైర్యాన్ని మాత్రం టచ్ చేయలేకపోయిందని ఆమె వివరించారు. ఈ సందర్భంగా తోటి మహిళలకు ఆమె ఒక ముఖ్యమైన సందేశాన్ని ఇచ్చారు.

"తమలో తాము కుంగిపోతూ, వెలుగును కోల్పోతున్న ప్రతి మహిళా లేచి నిలబడాలి. మీరు చాలా అందమైన వారు. మీ శరీరంలోని మచ్చలు లోపాలు కావు.. అవి మీ ధైర్యానికి నిదర్శనమైన కిరీటాలు" అని రాజశ్రీ పేర్కొన్నారు. మహిళలు తమ ఆత్మవిశ్వాసాన్ని కోల్పోకూడదని, ప్రతి సవాలును ధైర్యంగా ఎదుర్కోవాలని ఆమె ఆకాంక్షించారు.

ప్రస్తుతం రాజశ్రీ దేశ్‌పాండే తన కొత్త సినిమా ప్రమోషన్లలో ఉత్సాహంగా పాల్గొంటున్నారు. తన హృదయంలో ప్రేమను, మనసులో ధైర్యాన్ని నింపుకుని తల ఎత్తుకుని నిలబడతానని ఆమె చెప్పారు. జీవితాన్ని పరిపూర్ణంగా గడపడమే తన లక్ష్యమని, క్యాన్సర్ పోరాటం తనను మరింత బలవంతురాలిని చేసిందని ఆమె మాటల్లో స్పష్టమవుతోంది. రాజశ్రీ చేసిన ఈ పోస్ట్ ఆమె అభిమానులతో పాటు, క్యాన్సర్‌తో పోరాడుతున్న ఎంతోమందికి స్ఫూర్తినిస్తోంది.

Hari Prasad S, Hyderabad