ప్రధానమంత్రి నరేంద్ర మోదీకి చెందిన ఫేస్బుక్ వీడియోను ఐదు గంటల పాటు నిలిపివేసిన వ్యవహారంలో సోషల్ మీడియా దిగ్గజం 'మెటా' దిగొచ్చింది.
ఈ పొరపాటుపై కేంద్ర ఎలక్ట్రానిక్స్, ఐటీ శాఖ మంత్రి అశ్విని వైష్ణవ్ను కలిసి సంస్థ గ్లోబల్ చీఫ్ ఆఫీసర్ జోయల్ కాప్లాన్ నేరుగా క్షమాపణలు చెప్పారు.
"ప్రధాని మోదీ పోస్ట్ను పొరపాటున నిలిపివేసినందుకు మెటా తరఫున కేంద్ర మంత్రికి క్షమాపణలు తెలియజేశాను" అని జోయల్ కాప్లాన్ అధికారిక ప్రకటన విడుదల చేశారు.
పార్లమెంటరీ కమిటీ తీవ్ర హెచ్చరిక
పరీక్షల పేపర్ లీకేజీలపై కఠిన చర్యలు తీసుకుంటామని హామీ ఇస్తూ జులై 28న ప్రధాని మోదీ యువతను ఉద్దేశించి చేసిన వీడియో పోస్ట్ అర్ధరాత్రి 12:30 గంటల నుంచి ఉదయం 5:30 గంటల వరకు ఫేస్బుక్లో కనిపించకుండా పోయింది. దీనిపై పార్లమెంటరీ ఐటీ కమిటీ ఛైర్మన్, బీజేపీ ఎంపీ నిషికాంత్ దూబే తీవ్రంగా స్పందించారు. మెటా అధినేత మార్క్ జుకర్బర్గ్ మూడు రోజుల్లోగా బహిరంగ క్షమాపణ చెప్పాలని, లేకపోతే ఐటీ చట్టం ప్రకారం దక్కే చట్టపరమైన రక్షణను (Safe Harbour) ఉపసంహరించుకుంటామని హెచ్చరించారు. ఈ పరిణామాల నేపథ్యంలో కేంద్ర ప్రభుత్వం మెటా ఉన్నతాధికారులకు సమన్లు పంపింది.
ఈ వివాదానికి కొన్ని రోజుల ముందే, విద్యార్థుల ఆందోళనల నడుమ అప్పటి విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేసిన నేపథ్యం ఉంది.
కేంద్రం అసంతృప్తి - సాంకేతిక లోపం సాకు చెల్లదన్న ఐటీ శాఖ
కేంద్ర మంత్రి అశ్విని వైష్ణవ్తో పాటు ఐటీ శాఖ కార్యదర్శి ఎస్.కృష్ణన్తో కూడా జోయల్ కాప్లాన్ బృందం ప్రత్యేకంగా సమావేశమైంది. సాంకేతిక లోపం వల్లే మోదీ వీడియో తొలగింపు జరిగిందని, ఆ తర్వాత దానిని పునరుద్ధరించామని మెటా వివరణ ఇచ్చింది. అయితే, ఈ సమాధానం అసంతృప్తికరంగా ఉందని ఐటీ మంత్రిత్వ శాఖ స్పష్టం చేసింది.
బాలల రక్షణపై కఠిన చర్యలకు డిమాండ్
ప్రధాని వీడియో వ్యవహారంతో పాటు ప్లాట్ఫామ్లలో బాలల లైంగిక వేధింపుల కంటెంట్ (CSAM), మహిళలను తక్కువ చేసి చూపించే మెటీరియల్పై కఠిన చర్యలు తీసుకోవాలని పార్లమెంటరీ కమిటీ మెటాను ఆదేశించింది. బీబీసీ ఐ (BBC Eye) నిర్వహించిన విచారణలో బాలల లైంగిక వేధింపులను ప్రోత్సహించేలా దాదాపు 30 ప్రకటనలు ఉన్నట్లు వెల్లడికావడంతో మెటా కంటెంట్ పరిశీలన వ్యవస్థపై తీవ్ర ఆరోపణలు వచ్చాయి.
"కంటెంట్ నియంత్రణ, బాలల రక్షణ, కృత్రిమ మేధతో సృష్టించే నకిలీ సమాచారం (AI/Deepfakes), ప్రముఖుల వెరిఫైడ్ ఖాతాలకు ఉండాల్సిన భద్రతా ప్రమాణాలపై మెటా అధికారులతో మాట్లాడాము. వ్యవస్థలు సరిగ్గా ఎందుకు పనిచేయడం లేదో, వారు ఎదుర్కొంటున్న సవాళ్లేమిటో తెలుసుకోవాలనుకుంటున్నాం" అని ఐటీ కార్యదర్శి ఎస్.కృష్ణన్ వివరించారు.
Praveen Kumar Lenkala