ఈ ఉదంతంపై తృణమూల్ కాంగ్రెస్ (TMC) ఎంపీ కీర్తి ఆజాద్ తీవ్రస్థాయిలో ధ్వజమెత్తుతూ, ఈ ఎన్‌కౌంటర్ కేవలం ఒక పెద్ద డ్రామా అని, అధికార బీజేపీ తన అంతర్గత రహస్యాలను బయటపడకుండా దాచడానికే ఈ వ్యూహాన్ని అమలు చేసిందని సంచలన ఆరోపణలు చేశారు. నిందితుడు ప్రభాస్ మోండల్ అసలు సిసలైన బీజేపీ కార్యకర్త అని, అతనికి పార్టీకి సంబంధించిన అనేక అంతర్గత ప్రణాళికలు, రహస్య వ్యూహాల సమాచారం తెలుసని ఆయన పేర్కొన్నారు. ఆ రహస్యాలను ఎక్కడ బయటపెడతాడో అనే భయంతోనే, పోలీసుల రక్షణలో ఉండగానే పథకం ప్రకారం ఎన్‌కౌంటర్ పేరిట అంతమొందించారని విమర్శించారు.

పోలీసుల ఆధీనంలో ఉన్న నిందితుడిని అదుపులో ఉంచకుండా ఎన్‌కౌంటర్ చేయడం ఎలా సాధ్యమవుతుందని కీర్తి ఆజాద్ ప్రశ్నించారు. ఈ వ్యవహారమంతా ఒక పెద్ద ప్రహసనమని, ఇందులో ఎలాంటి నిజం లేదని ఆయన కొట్టిపారేశారు. ఇదే సమయంలో రామమందిరం విరాళాల దుర్వినియోగం కేసును కూడా ప్రస్తావిస్తూ ట్రస్ట్‌పై విరుచుకుపడ్డారు. ట్రస్ట్ నిర్వాహకులు చంపత్ రాయ్, అనిల్ మిశ్రా మధ్య జరుగుతున్న అంతర్గత విభేదాలు, పరస్పర విమర్శలే అక్కడ పెద్ద ఎత్తున అవినీతి జరిగిందనడానికి స్పష్టమైన నిదర్శనాలని ఆరోపించారు. తాత్కాలిక జనరల్ సెక్రటరీగా నియమితులైన కృష్ణమోహన్ నివాసంలో లభ్యమైన 80 లక్షల రూపాయలను మొదటి రోజే ట్రస్ట్ ఖాతాలో ఎందుకు జమ చేయలేదని, ఆ రోజే ఎందుకు ఎఫ్ఐఆర్ (FIR) నమోదు చేయలేదని ప్రశ్నించారు. ఈ కేసుల దర్యాప్తు కోసం ఏర్పాటు చేసిన ప్రత్యేక దర్యాప్తు బృందాలు (SIT) కేవలం ఒక కంటితుడుపు చర్య మాత్రమేనని నిప్పులు చెరిగారు.

బారుఇపూర్ పోలీసు సూపరింటెండెంట్ (SP) తెలిపిన వివరాల ప్రకారం, శనివారం కనిపించకుండా పోయిన 12 ఏళ్ల బాలిక ఒక చెరువులో మృతదేహమై లభించడం స్థానికంగా తీవ్ర నిరసనలకు దారితీసింది. ఈ క్రూరమైన అత్యాచారం, హత్య కేసులో ప్రధాన నిందితుడైన ప్రభాస్ మోండల్‌ను అరెస్ట్ చేసిన పోలీసులు, నేరం జరిగిన తీరును పునర్నిర్మించే (Crime Scene Reconstruction) ప్రక్రియ కోసం బుధవారం ఉదయం ఘటనా స్థలానికి తీసుకెళ్లారు. ఆ సమయంలో నిందితుడు అకస్మాత్తుగా ఒక అధికారి వద్ద ఉన్న సర్వీస్ రివాల్వర్‌ను లాక్కొని పోలీసులపైకి కాల్పులు జరిపి పారిపోవడానికి ప్రయత్నించాడని అధికారులు వెల్లడించారు. ఆత్మరక్షణ కోసం పోలీసులు జరిపిన ఎదురుకాల్పుల్లో నిందితుడికి తీవ్ర గాయాలయ్యాయని, వెంటనే ఆసుపత్రికి తరలించగా అప్పటికే మరణించినట్లు వైద్యులు ప్రకటించారని ఎస్పీ వివరించారు. ఈ ఘోర ఘటనను నిరసిస్తూ కోల్‌కతాలో మెడికల్ విద్యార్థుల నేతృత్వంలో భారీ ర్యాలీ నిర్వహించడానికి టీఎంసీ పార్టీ ప్రణాళికలు సిద్ధం చేసింది.

---------------

హిందూస్తాన్ సమచార్ / Santhosha Laxmi