రుతుపవనాల విస్తరణకు అనుకూలమైన పరిస్థితులు ఏర్పడటంతో గుజరాత్‌లోని మిగిలిన ప్రాంతాలు, రాజస్థాన్, హర్యానాలోని అదనపు ప్రాంతాల్లోకి ఇవి ఇప్పటికే ప్రవేశించాయి. వాతావరణ శాఖ విడుదల చేసిన తాజా బులెటిన్ ప్రకారం ఉప-హిమాలయ పశ్చిమ బెంగాల్, సిక్కిం పరిసర ప్రాంతాలలో అత్యంత తీవ్రమైన వర్షాలు కురిసే అవకాశం ఉందని అధికారులు స్పష్టం చేశారు. అలాగే అరుణాచల్ ప్రదేశ్, అస్సాం, మేఘాలయ, కోస్టల్ కర్ణాటక, తూర్పు రాజస్థాన్, గుజరాత్, కొంకణ్, గోవా, మధ్య మహారాష్ట్ర, మధ్యప్రదేశ్ తదితర ప్రాంతాలలో కొన్ని చోట్ల భారీ నుండి అతి భారీ వర్షాలు పడతాయని అంచనా వేశారు. జాతీయ రాజధాని ఢిల్లీతో పాటు హర్యానా, చండీగఢ్, బీహార్, హిమాచల్ ప్రదేశ్, జమ్మూ కాశ్మీర్, లడఖ్, కేరళ, నాగాలాండ్, మణిపూర్, మిజోరాం, త్రిపుర, పంజాబ్, ఉత్తరాఖండ్, పశ్చిమ ఉత్తరప్రదేశ్ రాష్ట్రాలలో కూడా ఈ సమయంలో మోస్తరు నుండి భారీ వర్షపాతం నమోదయ్యే అవకాశం ఉంది. ద్వీపకల్ప, మధ్య మరియు ఈశాన్య భారతదేశంలో బలమైన ఈదురుగాలులు గంటకు 40 నుండి 60 కిలోమీటర్ల వేగంతో వీస్తూ, పిడుగులతో కూడిన వర్షాలు పడే ఆస్కారం ఉందని వాతావరణ నిపుణులు తెలిపారు. తీరప్రాంతాలు, పశ్చిమ కనుమల పరిసరాల్లో కురుస్తున్న ఈ అకాల వర్షాల వల్ల ఇప్పటికే సాధారణ జనజీవనం తీవ్రంగా స్తంభించిపోయింది. హర్యానాలోని గురుగ్రామ్ నరసింగ్‌పూర్ పరిసరాల్లో జాతీయ రహదారి-48 లోని ఒక ప్రధాన భాగం భారీ వర్షాల ధాటికి కుంగిపోవడంతో వాహనాల రాకపోకలకు తీవ్ర అంతరాయం ఏర్పడింది. మరోవైపు ఉత్తరాఖండ్‌లో కొండచరియలు విరిగిపడటం, యమునోత్రి జాతీయ రహదారిపై భారీగా రాళ్లు, శిథిలాలు వచ్చి పడటంతో రవాణా వ్యవస్థ నిలిచిపోయింది. విపత్తు నిర్వహణ బృందాలు రహదారులను పునరుద్ధరించే పనుల్లో నిరంతరం శ్రమిస్తున్నాయి. వర్షాలు తీవ్రంగా ఉన్న ప్రాంతాల్లోని ప్రజలు ప్రయాణాలు చేసేటప్పుడు రోడ్ల పరిస్థితిని ముందుగానే తెలుసుకోవాలని, ట్రాఫిక్ నిబంధనలను పాటించాలని వాతావరణ శాఖ సూచించింది. లోతట్టు ప్రాంతాల ప్రజలు అప్రమత్తంగా ఉండాలని, వరద నీరు చేరిన ప్రదేశాలకు, బలహీనమైన కట్టడాలకు దూరంగా ఉండాలని హెచ్చరించారు. కొండ ప్రాంతాలలో నివసించే ప్రజలు కొండచరియలు విరిగిపడే ప్రమాదం ఉన్నందున మరింత జాగ్రత్తగా వ్యవహరించాలని అధికారులు తుది మార్గదర్శకాలలో పేర్కొన్నారు.

---------------

హిందూస్తాన్ సమచార్ / Santhosha Laxmi