ప్రధాన మంత్రి నరేంద్ర మోదీ ప్రారంభించిన 'ఏక్ పేడ్ మా కే నామ్' (తల్లి పేరు మీద ఒక మొక్క) ప్రచారంలో భాగంగా, రాబోయే నాలుగేళ్లలో ఢిల్లీ రిడ్జ్ ప్రాంతంలో కోటి కంటే ఎక్కువ స్థానిక జాతికి చెందిన మొక్కలను నాటాలని ప్రభుత్వం నిర్ణయించింది. ఈ కార్యక్రమంలో భాగంగా దేశ రాజధాని వ్యాప్తంగా 70 లక్షల మొక్కలు నాటే మిషన్‌ను కూడా అమిత్ షా ప్రారంభించారు. ఈ సందర్భంగా అమిత్ షా మాట్లాడుతూ, రిడ్జ్ ప్రాంతాన్ని ఢిల్లీకి 'ఊపిరితిత్తులు'గా మార్చడమే ప్రభుత్వ ఉద్దేశమని స్పష్టం చేశారు. రిడ్జ్ ప్రాంతంలోని దాదాపు 6,300 హెక్టార్ల అటవీ భూమిని కాపాడటంతో పాటు, పర్యావరణ సమతుల్యతను పునరుద్ధరించడంపై ప్రభుత్వం దృష్టి సారించిందని తెలిపారు. ఈ ప్రణాళికలో భాగంగా సుమారు 35 లక్షల భారీ వృక్షాలతో పాటు, 65 లక్షల వరకు పొదలు, వెదురు మరియు ఔషధ మొక్కలను నాటనున్నారు. ముఖ్యంగా పీపల్, మర్రి, వేప, గులర్, అర్జున మరియు నేరేడు వంటి స్థానిక వృక్ష జాతులకు పెద్దపీట వేయడం ద్వారా జీవవైవిధ్యాన్ని మెరుగుపరచాలని ప్రభుత్వం లక్ష్యంగా పెట్టుకుంది. కేవలం మొక్కలు నాటడమే కాకుండా, 2026-2036 కాలానికి ప్రత్యేకంగా అటవీ నిర్వహణ ప్రణాళికను, అసోలా భట్టి వన్యప్రాణుల అభయారణ్య మేనేజ్‌మెంట్ ప్లాన్‌ను మరియు ఢిల్లీ బర్డ్ అట్లాస్‌ను సిద్ధం చేసినట్లు ఆయన వెల్లడించారు. ఈ కార్యక్రమంలో ఢిల్లీ ముఖ్యమంత్రి రేఖ గుప్తాతో పాటు పలువురు కేంద్ర, రాష్ట్ర మంత్రులు, బిజెపి ఎంపీలు పాల్గొన్నారు. అలాగే, ఢిల్లీలోని డైరీల నుండి ప్రతిరోజూ వెలువడే దాదాపు 1,500 మెట్రిక్ టన్నుల పశువుల పేడను యమునా నదిలో కలవకుండా, వాటిని బయోగ్యాస్ మరియు సహజ ఎరువులుగా మార్చేందుకు నేషనల్ డైరీ డెవలప్‌మెంట్ బోర్డ్ (NDDB)తో ఒప్పందం చేసుకోనున్నట్లు ఆయన తెలిపారు. నరేలాలో హై-సెక్యూరిటీ జైలు శంకుస్థాపన, ఆటోమేటెడ్ వెహికల్ టెస్టింగ్ సెంటర్ ప్రారంభోత్సవం, 300 ఎలక్ట్రిక్ బస్సుల ప్రారంభం వంటి మరికొన్ని అభివృద్ధి కార్యక్రమాలను కూడా ఈ ఒకే వేదికపై అమిత్ షా ప్రారంభించారు.

---------------

హిందూస్తాన్ సమచార్ / Santhosha Laxmi