అమరావతి, 22 మే (హి.స.)

సుప్రీంకోర్టు మాజీ న్యాయమూర్తి, తెలుగువారైన జస్టిస్ లావు నాగేశ్వరరావుకు అరుదైన అంతర్జాతీయ గౌరవం లభించింది. లండన్లోని అత్యంత ప్రతిష్ఠాత్మకమైన 'హానరబుల్ సొసైటీ ఆఫ్ ది ఇన్నర్ టెంపుల్' సంస్థ, 2024 సంవత్సరానికి గాను ఆయనను గౌరవ బెంచర్గా ఎంపిక చేసింది.

భారత న్యాయవ్యవస్థకు, ముఖ్యంగా తెలుగు వారికి ఇది గర్వకారణం.

ఇంగ్లండ్, వేల్స్లో బారిస్టర్లకు శిక్షణ ఇచ్చి, వారిని నియంత్రించే నాలుగు చారిత్రక 'ఇన్స్ ఆఫ్ కోర్ట్'లలో ఇన్నర్ టెంపుల్ ఒకటి. దాదాపు 600 ఏళ్ల చరిత్ర కలిగిన ఈ సంస్థ న్యాయ రంగానికి, ప్రజా సేవకు విశేష కృషి చేసిన ప్రపంచవ్యాప్త న్యాయమూర్తులు, న్యాయవాదులు, రాజనీతిజ్ఞులను గౌరవ బెంచర్లుగా ఎంపిక చేస్తుంది. ఈ అరుదైన అవకాశం ఇప్పుడు జస్టిస్ నాగేశ్వరరావుకు దక్కింది.

అంచెలంచెలుగా ఎదిగిన ప్రస్థానం

ఆంధ్రప్రదేశ్లోని గుంటూరు జిల్లాకు చెందిన జస్టిస్ లావు నాగేశ్వరరావు నాగార్జున విశ్వవిద్యాలయంలో న్యాయవిద్యను పూర్తి చేశారు. గుంటూరు జిల్లా కోర్టులో, ఆ తర్వాత ఉమ్మడి ఆంధ్రప్రదేశ్ హైకోర్టులో న్యాయవాదిగా ప్రాక్టీస్ చేశారు. తన అసాధారణ ప్రతిభతో 2000వ సంవత్సరంలో సీనియర్ అడ్వకేట్గా గుర్తింపు పొందారు. భారత అదనపు సొలిసిటర్ జనరల్గానూ కీలక బాధ్యతలు నిర్వర్తించారు.

హైకోర్టు న్యాయమూర్తిగా పనిచేయకుండా, నేరుగా బార్ నుంచి సుప్రీంకోర్టు న్యాయమూర్తిగా పదోన్నతి పొందిన ఏడో న్యాయవాదిగా జస్టిస్ నాగేశ్వరరావు చరిత్ర సృష్టించారు. 2016 నుంచి 2022 వరకు సుప్రీంకోర్టు న్యాయమూర్తిగా సేవలందించారు. తన పదవీ కాలంలో రాజ్యాంగపరమైన అంశాలు, పౌర హక్కులు, రిజర్వేషన్లు, మత స్వేచ్ఛ వంటి అనేక చారిత్రక తీర్పులలో ఆయన భాగస్వామిగా ఉన్నారు.

ప్రస్తుతం ఆయన లండన్లోని '39 ఎసెక్స్ ఛాంబర్స్'లో డోర్ టెనెంట్గా అనుబంధం కలిగి ఉన్నారు. ఈ నియామకంపై జస్టిస్ నాగేశ్వరరావు స్పందిస్తూ, ఇన్నర్ టెంపుల్ గౌరవ బెంచర్గా బాధ్యతలు స్వీకరించడం గొప్ప గౌరవంగా భావిస్తున్నానని, సంస్థ విద్యా కార్యకలాపాలకు తన వంతు సహకారం అందించడానికి ఆసక్తిగా ఎదురుచూస్తున్నానని తెలిపారు. భారత న్యాయ నిపుణుల ప్రతిభకు ప్రపంచ వేదికపై లభిస్తున్న గుర్తింపునకు ఈ నియామకం ఒక నిదర్శనమని న్యాయ వర్గాలు అభిప్రాయపడుతున్నాయి.