ఈ సందర్భంగా నెల్లూరులో జరుగుతున్న మహానాడు ఉత్సవాల్లో టీడీపీ అధినేత, ఆంధ్రప్రదేశ్ ముఖ్యమంత్రి నారా చంద్రబాబు నాయుడు పాల్గొని ఎన్టీఆర్‌కు ఘన నివాళులర్పించారు. దేశానికి, తెలుగుజాతికి ఆయన చేసిన అసమాన సేవలను గుర్తిస్తూ కేంద్ర ప్రభుత్వం ఎన్టీఆర్‌కు దేశ అత్యున్నత పురస్కారమైన 'భారతరత్న' ప్రకటించాలని డిమాండ్ చేస్తూ చంద్రబాబు ప్రవేశపెట్టిన చారిత్రాత్మక తీర్మానాన్ని మహానాడు వేదికగా ప్రతినిధులు ఏకగ్రీవంగా ఆమోదించారు. ఇది కేవలం ఒక పార్టీ డిమాండ్ కాదని, కోట్ల మంది తెలుగు ప్రజల మనోభావమని చంద్రబాబు ఈ సందర్భంగా స్పష్టం చేశారు.

ఒక సాధారణ ఉద్యోగిగా జీవితాన్ని ప్రారంభించి, వెండితెరపై తిరుగులేని నటుడిగా ఎదిగి, పార్టీ పెట్టిన కేవలం 9 నెలల్లోనే అధికారంలోకి తెచ్చిన ఘనత ఒక్క ఎన్టీఆర్‌కే సాధ్యమైందని సీఎం చంద్రబాబు కొనియాడారు. "సమాజమే దేవాలయం.. ప్రజలే దేవుళ్లు" అనే సిద్ధాంతంతో ఎన్టీఆర్ చేసిన పాలన దేశ రాజకీయాలకే ఆదర్శంగా నిలిచిందని, కేంద్రంలో ప్రభుత్వాల ఏర్పాటులో తెలుగుదేశం కీలక పాత్ర పోషించేలా ఆయనే పునాదులు వేశారని గుర్తుచేశారు. ఆయన ఆశయాల సాధనలో భాగంగానే భవిష్యత్ నాయకత్వాన్ని తయారు చేసే క్రమంలో నారా లోకేష్ ప్రతిపాదించిన మహిళలకు 33 శాతం సీట్ల కేటాయింపును పార్టీలో ముందుగా అమలు చేయనున్నట్లు ప్రకటించారు. ఈ వేడుకల్లో నందమూరి కుటుంబ సభ్యులు ఉత్సాహంగా పాల్గొనగా, నారా భువనేశ్వరి ఎన్టీఆర్ విగ్రహానికి పూలమాలలు వేసి నివాళులర్పించారు.

---------------

హిందూస్తాన్ సమచార్ / నాగరాజ్ రావు