ఆయన మృతితో సినీ పరిశ్రమలో విషాదం నెలకొంది.

దర్శకధీరుడు ఎస్.ఎస్. రాజమౌళి తెరకెక్కించిన 'సై' సినిమాతో ప్రదీప్ రావత్ తెలుగు ప్రేక్షకులకు మరింత చేరువయ్యారు. ఈ చిత్రంలో భిక్షు యాదవ్ పాత్రలో తనదైన నటనతో ఆకట్టుకున్నారు. ఈ పాత్రకు గాను ఉత్తమ ప్రతినాయకుడిగా ఫిలింఫేర్ అవార్డును కూడా అందుకున్నారు.

'సై' తర్వాత ప్రదీప్ రావత్ పలు తెలుగు చిత్రాల్లో కీలక పాత్రలు పోషించారు. 'ఛత్రపతి', 'గజిని', 'లక్ష్మీ', 'భద్ర', 'యోగి', 'దేశముదురు', 'అందరివాడు', 'స్టాలిన్', '1-నేనొక్కడినే', 'నేను శైలజ' వంటి సినిమాల్లో నటించారు. ముఖ్యంగా ప్రతినాయక పాత్రల్లో తన ప్రత్యేకమైన నటనతో ప్రేక్షకులపై చెరగని ముద్ర వేశారు.

తెలుగుతో పాటు హిందీ, తమిళం, కన్నడ, మలయాళం, బెంగాలీ, మరాఠీ, భోజ్‌పురి భాషల్లోనూ ప్రదీప్ రావత్ నటించారు. బాలీవుడ్‌లో 'లగాన్', 'గజినీ' వంటి విజయవంతమైన చిత్రాల్లోనూ గుర్తుండిపోయే పాత్రలు పోషించారు.

'మహాభారత్‌'తో దేశవ్యాప్తంగా గుర్తింపు

ప్రదీప్ రావత్ 1952 జనవరి 21న మధ్యప్రదేశ్‌లోని జబల్‌పూర్‌లో జన్మించారు. 1985లో విడుదలైన 'మేరీ జంగ్' సినిమాతో హిందీ సినీ రంగంలోకి అడుగుపెట్టారు. అనంతరం బుల్లితెరపైనా నటించారు.

బి.ఆర్. చోప్రా రూపొందించిన 'మహాభారత్' సీరియల్‌లో అశ్వత్థామ పాత్రలో నటించి దేశవ్యాప్తంగా గుర్తింపు తెచ్చుకున్నారు. ఆ తర్వాత సినిమాల్లోనూ విభిన్న పాత్రలు పోషిస్తూ తనకంటూ ప్రత్యేక గుర్తింపు సంపాదించుకున్నారు.

తెలుగు సినీ పరిశ్రమలో 'సై' సినిమాతో వచ్చిన గుర్తింపు ప్రదీప్ రావత్ కెరీర్‌లో కీలక మలుపుగా నిలిచింది. భిక్షు యాదవ్ పాత్రలో ఆయన చూపించిన ప్రతినాయక ఛాయలు ప్రేక్షకులకు ఇప్పటికీ గుర్తుండిపోయాయి. ఆయన మరణ వార్తతో పలువురు సినీ ప్రముఖులు, అభిమానులు దిగ్భ్రాంతికి గురయ్యారు.