Ford Mustang Cobra Jet 2200: ఫోర్డ్ కంపెనీకి చెందిన మస్టాంగ్ కోబ్రా జెట్ 2200 (Mustang Cobra Jet 2200) ఎలక్ట్రిక్ కార్ తాజాగా అమెరికాలో జరిగిన రేసింగ్ ఈవెంట్‌లో సరికొత్త చరిత్ర సృష్టించింది.

కేవలం 6.76 సెకన్లలోనే క్వార్టర్ మైలు (400 మీటర్లు) దూరాన్ని అధిగమించి అందరినీ ఆశ్చర్యపరిచింది. ఈ పరుగులో కారు గరిష్టంగా గంటకు 357 కిలోమీటర్ల (222 mph) వేగాన్ని అందుకుంది. దీనివల్ల అమెరికాలోనే ఫాస్టెస్ట్ ఎలక్ట్రిక్ కార్‌గా ఇది రికార్డు పుటల్లోకి ఎక్కింది.

అద్భుతమైన పవర్, టెక్నాలజీ..

ఈ ఎలక్ట్రిక్ కారు ఇంత వేగంగా దూసుకెళ్లడం వెనుక ఫోర్డ్ ఇంజనీర్ల కృషి ఎంతో ఉంది. దీనిలో అమర్చిన రెండు ఎలక్ట్రిక్ మోటార్లు కలిపి ఏకంగా 2,200 HP (హార్స్‌పవర్) శక్తిని ఉత్పత్తి చేస్తాయి. అలాగే 1,340 ft-lbs టార్క్‌ను ఇది జనరేట్ చేస్తుంది. సాధారణంగా ఎలక్ట్రిక్ కార్లలో ఒకటి లేదా రెండు గేర్లు మాత్రమే ఉంటాయి. కానీ ఫోర్డ్ దీనిలో ప్రత్యేకంగా 5-స్పీడ్ ట్రాన్స్‌మిషన్ గేర్‌బాక్స్‌ను అమర్చింది. దీనివల్ల చక్రాలకు నిరంతరాయంగా, శక్తివంతంగా పవర్ సరఫరా అవుతుంది.

తక్కువ బరువు.. ఎక్కువ వేగం..

వేగాన్ని పెంచడానికి కారు బరువును తగ్గించడం అత్యంత ముఖ్యం. ఫోర్డ్ ఇంజనీర్లు ఈ నమూనాను మునుపటి మోడల్ కంటే దాదాపు 900 కిలోల (2,000 పౌండ్లు) బరువు తగ్గించారు. కారు బాడీని తేలికపాటి కార్బన్-ఫైబర్‌తో నిర్మించారు. బరువు తగ్గడం వల్ల కారు గాలిని చీల్చుకుంటూ అత్యంత సునాయాసంగా దూసుకెళ్లగలుగుతోంది.

భద్రత, అధునాతన ఫీచర్లు..

వేగంతో పాటు భద్రతకు కూడా ఫోర్డ్ పెద్దపీట వేసింది. టైర్ గ్రిప్ (RACC): రేసింగ్ ప్రారంభ సమయంలో టైర్లు రోడ్డుపై జారిపోకుండా ఉండటానికి ఫోర్డ్ ఒక ప్రత్యేక క్లచ్ సిస్టమ్‌ను పేటెంట్ చేసింది. ఇది కారును ట్రాక్‌పై స్ట్రెయిట్‌గా ఉంచుతుంది.

పైరోఫ్యూజ్ (Pyrofuse) టెక్నాలజీ: అత్యవసర సమయాల్లో విద్యుత్ ప్రమాదాలు జరగకుండా ఉండటానికి దీనిలో పైరోఫ్యూజ్ అనే వ్యవస్థ ఉంది. ఏదైనా ప్రమాదం జరిగితే, ఇది ఒక చిన్నపాటి పేలుడు ద్వారా విద్యుత్ కనెక్షన్‌ను సెకనులో వందవ వంతు కాలంలోనే కట్ చేస్తుంది. సాధారణ ఫ్యూజుల కంటే ఇది వేగంగా పనిచేస్తుంది.