ఇంగ్లాండ్ వేదికగా జరిగిన ఐసీసీ మహిళల టీ20 వరల్డ్ కప్ 2026 ఫైనల్లో ఆతిథ్య ఇంగ్లాండ్ జట్టును మట్టికరిపించి సోఫీ మోలినెక్స్ సేన ట్రోఫీని కైవసం చేసుకుంది. ఈ మెగా టోర్నీలో ఒక్క మ్యాచ్ కూడా ఓడిపోకుండా అజేయంగా నిలిచినందుకు గానూ ఆస్ట్రేలియా జట్టుకు భారీ స్థాయిలో ప్రైజ్ మనీ లభించింది. దాదాపు రూ. 23.7 కోట్ల భారీ మొత్తాన్ని ఆసీస్ విమెన్స్ టీమ్ సొంతం చేసుకుంది.

ఈసారి పెరిగిన ఐసీసీ మెగా ప్రైజ్ పూల్

మహిళల క్రికెట్‌కు ఆదరణ పెరుగుతున్న నేపథ్యంలో ఐసీసీ ఈసారి ప్రైజ్ మనీ బడ్జెట్‌ను భారీగా పెంచింది. చరిత్రలో మొదటిసారిగా ఈ ఏడాది 12 జట్లతో మహిళల టీ20 ప్రపంచకప్‌ను నిర్వహించారు. గతంలో (2024 వరల్డ్ కప్) 7.95 మిలియన్ డాలర్లుగా ఉన్న మొత్తం ప్రైజ్ పూల్‌ను, ఈసారి జట్ల సంఖ్య పెరగడంతో 8.76 మిలియన్ డాలర్లకు పెంచారు. అంటే భారత కరెన్సీలో దాదాపు రూ.83.40 కోట్ల రూపాయలను టోర్నీలో పాల్గొన్న అన్ని జట్లకు పంచనున్నారు. అయితే విజేత, రన్నరప్ జట్లకు ఇచ్చే ప్రధాన ప్రైజ్ మనీ మొత్తంలో మాత్రం ఎలాంటి మార్పు చేయకుండా గత సీజన్ లీగ్‌ల ప్రమాణాలనే కొనసాగించారు.

ఒక్క మ్యాచ్ కూడా ఓడిపోకుండా కప్ కొట్టిన ఆసీస్

ఛాంపియన్‌గా నిలిచిన ఆస్ట్రేలియా జట్టుకు కేవలం టైటిల్ గెలిచినందుకు గానూ ఐసీసీ 2.34 మిలియన్ డాలర్లు (దాదాపు రూ.22.25 కోట్లు) బహుమతిగా అందించింది. అయితే ఆస్ట్రేలియా సంపాదన అంతటితో ఆగలేదు. లీగ్ దశలో సాధించిన ప్రతి విజయానికి ఐసీసీ అదనపు నగదు పురస్కారాన్ని ముందే ప్రకటించింది. గ్రూప్ స్టేజ్‌లో సాధించే ప్రతి గెలుపునకు 31,154 డాలర్లు (రూ.29.6 లక్షలు) బోనస్‌గా ఇస్తారు. ఈ టోర్నీలో ఆస్ట్రేలియా లీగ్ దశలో ఆడిన ఐదు మ్యాచ్‌లలోనూ విజయం సాధించింది. దీనివల్ల ఆ జట్టుకు అదనంగా మరో రూ.1.45 కోట్లు వచ్చాయి. మొత్తంగా కలుపుకుంటే ఆసీస్ బోర్డు ఖాతాలో రూ.23.7 కోట్లు చేరాయి.

ఫైనల్లో ఓడినా ఇంగ్లాండ్ ఖాతాలోకి కోట్ల రూపాయలు

సొంతగడ్డపై మొదటిసారి ప్రపంచకప్ ఫైనల్లో ఓడిపోయి రన్నరప్‌గా నిలిచిన ఇంగ్లాండ్ జట్టుకు కూడా ఐసీసీ భారీ మొత్తాన్నే అందజేసింది. రన్నరప్ స్థానంలో నిలిచినందుకు గానూ ఇంగ్లాండ్‌కు 1.17 మిలియన్ డాలర్లు అంటే సుమారు రూ.11.10 కోట్ల ప్రైజ్ మనీ లభించింది. ఆస్ట్రేలియా తరహాలోనే ఇంగ్లాండ్ జట్టు కూడా గ్రూప్ స్టేజ్‌లో ఆడిన ఐదు మ్యాచ్‌లలోనూ వరుస విజయాలు సాధించింది. దీనివల్ల ఆ జట్టుకు కూడా అదనపు బోనస్ రూపంలో రూ.1.45 కోట్లు దక్కాయి. ఫైనల్లో ఓడినప్పటికీ రన్నరప్ ప్రైజ్ మనీ, లీగ్ బోనస్ అంతా కలుపుకుని ఇంగ్లాండ్ మహిళల జట్టు మొత్తం రూ. 12.55 కోట్ల రూపాయలను తన ఇంటికి తీసుకెళ్లింది.

టీ20 వరల్డ్ కప్‌లో నిరాశపరిచిన టీమిండియా

గతేడాది నవంబర్‌లో జరిగిన వన్డే ప్రపంచకప్‌లో అద్భుత ప్రదర్శనతో సరికొత్త ఛాంపియన్‌గా అవతరించి కోట్ల రూపాయల ప్రైజ్ మనీ గెలుచుకున్న భారత మహిళల జట్టు ఈసారి మాత్రం తీవ్రంగా నిరాశపరిచింది. ఈ టీ20 వరల్డ్ కప్‌లో హర్మన్‌ప్రీత్ సేన కనీసం సెమీఫైనల్‌కు కూడా చేరకుండా గ్రూప్ దశలోనే టోర్నీ నుంచి నిష్క్రమించింది. గ్రూప్ స్టేజ్‌లో భారత జట్టు ఆడిన మ్యాచ్‌లలో కేవలం మూడింట్లో మాత్రమే విజయం సాధించింది. దీనివల్ల భారత జట్టుకు లీగ్ దశలో ఆడిన మ్యాచ్‌ల ఫీజులు, గెలిచిన మూడు మ్యాచ్‌ల బోనస్ మాత్రమే దక్కాయి. మొత్తంగా చూసుకుంటే ఈ వరల్డ్ కప్ ద్వారా టీమిండియా సంపాదన కనీసం కోటి రూపాయలు కూడా దాటలేదు. భారత జట్టు కేవలం రూ. 90 లక్షల ప్రైజ్ మనీతోనే సరిపెట్టుకోవాల్సి వచ్చింది.