గన్నవరం ఎమ్మెల్యే గిడ్డి సత్యనారాయణ చేతుల మీదుగా నగరం గ్రామంలోని 45 ఆషూర్ఖానాలకు ఒక్కో దానికి రూ.5,000 చొప్పున ఆర్థిక సాయం అందజేశారు.

ఈ సందర్భంగా ఎమ్మెల్యే మాట్లాడుతూ, కూటమి ప్రభుత్వం ఏర్పడిన తర్వాత గత ఏడాది రాష్ట్రవ్యాప్తంగా 190 ఆషూర్ఖానాలకు ఆర్థిక సాయం అందించగా, ఈ ఏడాది ఆ సంఖ్యను 251కు పెంచినట్లు తెలిపారు. మొహర్రం సందర్భంగా ఆషూర్ఖానాల నిర్వహణ కోసం ముస్లిం సోదరులకు ఈ సహాయం అందిస్తున్నామని పేర్కొన్నారు.

గతంలో ఇలాంటి ఆర్థిక సాయం ఎప్పుడూ అందించలేదని, కూటమి ప్రభుత్వం మైనార్టీల సంక్షేమానికి ప్రత్యేక ప్రాధాన్యత ఇస్తోందని ఎమ్మెల్యే అన్నారు. అలాగే వక్ఫ్ ఎడ్యుకేషన్ మిషన్, తాలీమ్-ఎ-హునర్ వంటి కార్యక్రమాల ద్వారా పేద ముస్లిం మైనారిటీ విద్యార్థుల విద్యాభివృద్ధికి కోట్లాది రూపాయలు వెచ్చిస్తున్న ఘనత కూడా కూటమి ప్రభుత్వానిదేనని ఆయన పేర్కొన్నారు. ఈ కార్యక్రమంలో ముఖరం హుస్సేన్, అబేద్ ఆలీ, కిశ్వర్ కాజారాని, అబ్బాస్ అలీ, ఫాకర్ సాహెబ్, సజ్జాద్ హుస్సేన్, పలువురు ముస్లిం ప్రముఖులు, కూటమి నాయకులు, కార్యకర్తలు మరియు గ్రామస్తులు పాల్గొన్నారు.