దశాబ్దాల కాలంగా ఉత్తరాంధ్ర ప్రజలు, కోట్లాది మంది తెలుగువారు ఎదురుచూస్తున్న రైల్వే జోన్ కల ఎట్టకేలకు సాకారమైంది. విశాఖపట్నం కేంద్రంగా 'దక్షిణ కోస్తా రైల్వే జోన్' ఏర్పాటు చేస్తూ కేంద్ర ప్రభుత్వం గెజిట్ నోటిఫికేషన్ విడుదల చేసింది.
2026 జూన్ 1వ తేదీ నుంచి ఈ జోన్ అధికారికంగా తన కార్యకలాపాలను ప్రారంభించనుంది. ఆంధ్రప్రదేశ్ రాష్ట్ర అభివృద్ధిలో ఇది ఒక చారిత్రాత్మక ఘట్టం.
విశాఖ రైల్వే జోన్: గెజిట్ నోటిఫికేషన్ విడుదల
ఆంధ్రప్రదేశ్ పునర్వ్యవస్థీకరణ చట్టంలో పేర్కొన్న హామీల్లో అత్యంత కీలకమైనది విశాఖ రైల్వే జోన్. సుదీర్ఘ నిరీక్షణ తర్వాత కేంద్ర ప్రభుత్వం ఈ జోన్ ఏర్పాటుకు సంబంధించిన గెజిట్ నోటిఫికేషన్ను జారీ చేసింది. ఈ నోటిఫికేషన్ ప్రకారం 2026 జూన్ 1 నుంచి విశాఖపట్నం కేంద్రంగా కొత్త రైల్వే జోన్ పూర్తిస్థాయిలో అందుబాటులోకి రానుంది. దీనివల్ల ఉత్తరాంధ్ర ప్రాంతం ఆర్థికంగా, పారిశ్రామికంగా మరింత బలోపేతం కానుంది.
జోన్ పరిధిలోకి వచ్చే కీలక డివిజన్లు
కొత్తగా ఏర్పడే ఈ దక్షిణ కోస్తా రైల్వే జోన్ పరిధిలో రాష్ట్రంలోని ప్రధాన డివిజన్లను చేర్చారు. విజయవాడ డివిజన్, గుంటూరు డివిజన్, గుంతకల్లు డివిజన్, ఈ మూడు డివిజన్లు ఇకపై విశాఖపట్నం కేంద్రంగా పనిచేస్తాయి. దీనివల్ల పరిపాలనా నిర్ణయాలు వేగవంతం కావడమే కాకుండా, స్థానిక అవసరాలకు అనుగుణంగా రైళ్ల రాకపోకలు, కొత్త ప్రాజెక్టుల కేటాయింపులో ప్రాధాన్యత లభించనుంది.
ప్రయాణం.. ప్రకటన నుంచి గెజిట్ వరకు
విశాఖ రైల్వే జోన్ ప్రయాణం అనేక మలుపులు తిరిగింది. 2019 ఫిబ్రవరిలో కేంద్ర ప్రభుత్వం తొలిసారిగా ఈ జోన్ ఏర్పాటుపై అధికారిక ప్రకటన చేసింది. అయితే సాంకేతిక కారణాలు, భూసేకరణ , ఇతర పరిపాలనాపరమైన చిక్కుల వల్ల కొంతకాలం ప్రాజెక్టు నెమ్మదించింది. చివరకు 2025 జనవరిలో సమగ్ర ప్రాజెక్టు నివేదికకు కేంద్రం ఆమోదం తెలిపింది. అదే నెలలో ప్రధానమంత్రి చేతుల మీదుగా జోనల్ కార్యాలయ భవన నిర్మాణానికి శంకుస్థాపన జరిగింది. ఇప్పుడు గెజిట్ నోటిఫికేషన్ రావడంతో అన్ని అడ్డంకులు తొలగిపోయాయి.
కార్యకలాపాలకు సర్వం సిద్ధం
జోన్ కార్యకలాపాలను ప్రారంభించేందుకు రైల్వే శాఖ ఇప్పటికే కసరత్తు పూర్తి చేసింది. జోన్ నిర్వహణలో కీలకమైన ఉన్నతాధికారుల నియామకం కూడా పూర్తయింది. ప్రిన్సిపల్ చీఫ్ మెకానికల్ ఇంజనీర్, ప్రిన్సిపల్ చీఫ్ ఎలక్ట్రికల్ ఇంజనీర్, ప్రిన్సిపల్ చీఫ్ ఇంజనీర్, ప్రిన్సిపల్ చీఫ్ పర్సనల్ ఆఫీసర్, ప్రిన్సిపల్ చీఫ్ ఫైనాన్షియల్ ఆఫీసర్, వీరంతా ఇప్పటికే తమ బాధ్యతలను స్వీకరించేందుకు సిద్ధంగా ఉన్నారు. పరిపాలనా సౌలభ్యం కోసం అవసరమైన మౌలిక సదుపాయాల కల్పన వేగంగా జరుగుతోంది.
ఉద్యోగుల ఉత్సాహం.. వేల సంఖ్యలో దరఖాస్తులు
విశాఖ జోన్లో పనిచేసేందుకు రైల్వే ఉద్యోగులు భారీగా ఆసక్తి చూపుతున్నారు. ఇతర డివిజన్ల నుంచి ఆప్షన్లు కోరగా దాదాపు 3,000 మంది ఉద్యోగులు విశాఖ జనరల్ మేనేజర్ కార్యాలయం పరిధిలో పనిచేయడానికి మొగ్గు చూపారు. ప్రస్తుత అంచనాల ప్రకారం జీఎం కార్యాలయంలో 1,200 మంది సిబ్బంది అవసరం కాగా, జోన్ మొత్తం పరిధిలో సుమారు 17,000 మంది ఉద్యోగులు విధులు నిర్వహించనున్నారు.
విశాఖ రైల్వే జోన్ ఏర్పాటు కేవలం ఒక కార్యాలయం ఏర్పాటు మాత్రమే కాదు, ఇది ఆంధ్రప్రదేశ్ ఆత్మగౌరవ ప్రతీక. జూన్ 1 నుంచి ప్రారంభం కానున్న ఈ ప్రయాణం రాష్ట్ర రవాణా రంగంలో విప్లవాత్మక మార్పులకు నాంది పలకనుంది. కొత్త రైళ్లు, మెరుగైన సౌకర్యాలు , ఉపాధి అవకాశాలతో విశాఖపట్నం రైల్వే మ్యాప్లో మరో మైలురాయిని అధిగమించబోతోంది.