Nicholas Pooran

Nicholas Pooran: క్రికెట్‌లో ఎప్పుడు ఎలాంటి సంచనాలు జరుగుతాయో ప్రత్యేకంగా చెప్పాల్సిన పనిలేదు. మరీ ముఖ్యంగా ఐపీఎల్‌లో ఇది ఎక్కువగా ఉంటుంది.

తాజాగా లక్నో సూపర్ జెయింట్స్ ప్లేయర్ నికోలస్ పూరన్ ఇలాంటి ఓ సంచలనాన్ని సృష్టించాడు.

నికోలస్ పూరన్ తన అద్భుత ఆటతీరుతో మరోసారి క్రికెట్ అభిమానులను తనవైపు తిప్పుకున్నాడు. లక్నో తరఫున ఆడుతున్న అతను, ముంబై ఇండియన్స్‌పై జరిగిన మ్యాచ్‌లో కేవలం 16 బంతుల్లో హాఫ్ సెంచరీ పూర్తి చేసి రికార్డు సృష్టించాడు. ఈ ప్రదర్శనతో లక్నో జట్టుకు రెండో అత్యంత వేగంగా హాఫ్ సెంచరీ చేసిన ఆటగాడిగా నిలిచాడు. మ్యాచ్ ప్రారంభం నుంచే దూకుడుగా ఆడిన పూరన్, బౌలర్లపై పూర్తిగా ఆధిపత్యం చెలాయించాడు.

తన రికార్డును తానే బద్దలు కొట్టిన పూరన్

పూరన్ ప్రత్యేకత అతని వేగం, అదే సమయంలో స్థిరత్వం. ఇప్పటికే లక్నో జట్టుకు అత్యంత వేగంగా ఫిఫ్టీ చేసిన రికార్డు అతని పేరుపై ఉండగా, ఇప్పుడు మళ్లీ అదే జాబితాలో రెండో స్థానాన్ని కూడా అతడే దక్కించుకున్నాడు. 2023లో ఆర్సీబీపై 15 బంతుల్లో ఫిఫ్టీ చేయడం అతని బెస్ట్ కాగా, ఇప్పుడు ముంబైపై 16 బంతుల్లో అర్ధశతకం సాధించాడు. అలాగే గత సీజన్లలో కూడా 18, 19 బంతుల్లో ఫిఫ్టీలు చేసి తన దూకుడును నిరూపించాడు. ఇలా చూస్తే లక్నోకు వేగవంతమైన ఫిఫ్టీలలో ఎక్కువ రికార్డులు పూరన్ పేరుతోనే ఉన్నాయని చెప్పాలి.

21 బంతుల్లో 63 పరుగులు

ఈ మ్యాచ్‌లో పూరన్ చేసిన ఇన్నింగ్స్ నిజంగా మ్యాచ్ మలుపు తిప్పేలా ఉంది. అతను కేవలం 21 బంతుల్లోనే 63 పరుగులు చేసి ప్రేక్షకులను అలరించాడు. ముఖ్యంగా సిక్సర్ల వర్షం కురిపిస్తూ ప్రత్యర్థి బౌలర్లను పూర్తిగా ఒత్తిడిలోకి నెట్టాడు. మొత్తం ఇన్నింగ్స్‌లో 8 సిక్సర్లు, ఒక ఫోర్ కొట్టడం అతని దూకుడును చూపిస్తుంది. అతని స్ట్రైక్‌రేట్ 300గా ఉండటం మరింత ప్రత్యేకం. అంటే ప్రతి బంతికి సగటున మూడు పరుగులు సాధించాడు. మూడో స్థానంలో బ్యాటింగ్‌కు వచ్చి టీంకు బలమైన ఆరంభం ఇచ్చాడు.

పూరన్ IPL కెరీర్ ఎలా ఉంది.?

నికోలస్ పూరన్ ఐపీఎల్‌లో ఇప్పటివరకు మంచి స్థిరత్వాన్ని చూపిస్తున్నాడు. అతను 99 మ్యాచ్‌లు ఆడి, 96 ఇన్నింగ్స్‌లలో బ్యాటింగ్ చేసి 2438 పరుగులు సాధించాడు. అతని సగటు 32.07గా ఉండగా, స్ట్రైక్‌రేట్ 164.84గా ఉంది. మొత్తం 15 అర్ధశతకాలు నమోదు చేయగా, అతని అత్యధిక స్కోరు 87 నాటౌట్‌గా ఉంది. మిడిల్ ఆర్డర్‌లో వేగంగా పరుగులు సాధించే ఆటగాడిగా పూరన్ ఇప్పుడు జట్టుకు కీలకమైన బ్యాటర్‌గా మారాడు.