Post Office: 60 ఏళ్ల తర్వాత హ్యాపీగా బతకాలా.? ఈ పథకాన్ని మించింది మరోటి లేదు

Post Office: వయసు పెరిగే కొద్దీ ఆరోగ్య ఖర్చులు, రోజువారీ అవసరాలు, ఆర్థిక భద్రత వంటి అంశాలు చాలా ముఖ్యంగా మారుతాయి.

ఉద్యోగం లేదా వ్యాపారం ద్వారా వచ్చే ఆదాయం తగ్గిన తర్వాత కూడా క్రమం తప్పకుండా డబ్బు చేతికి రావడం చాలా మందికి అవసరమవుతుంది. అలాంటి వారికి పోస్టాఫీస్ సీనియర్ సిటిజన్ సేవింగ్స్ స్కీమ్ (SCSS) బెస్ట్ ఆప్షన్‌గా చెప్పొచ్చు.

సీనియర్ సిటిజన్ సేవింగ్స్ స్కీమ్ అంటే ఏంటి?

సీనియర్ సిటిజన్ల కోసం ప్రత్యేకంగా రూపొందించిన పొదుపు పథకమే SCSS. ఇది కేంద్ర ప్రభుత్వ మద్దతుతో నడుస్తుండటంతో పెట్టుబడికి అధిక భద్రత ఉంటుంది. రిటైర్మెంట్ తర్వాత వచ్చిన మొత్తాన్ని సురక్షితంగా పెట్టుబడి పెట్టి నిర్దిష్ట కాలానికి వడ్డీ రూపంలో ఆదాయం పొందేందుకు ఈ పథకం ఉపయోగపడుతుంది.

ఇతర పెట్టుబడి మార్గాలైన స్టాక్ మార్కెట్, మ్యూచువల్ ఫండ్స్ వంటి వాటిలో మార్కెట్ హెచ్చుతగ్గుల ప్రభావం ఉంటుంది. కానీ SCSSలో పెట్టుబడికి అలాంటి అనిశ్చితి ఉండదు. అందుకే చాలా మంది వృద్ధులు ఈ పథకాన్ని ఎంచుకుంటున్నారు.

ఎవరు ఈ పథకంలో చేరవచ్చు?

ఈ పథకానికి కొన్ని నిర్దిష్ట అర్హతలు ఉన్నాయి. 60 సంవత్సరాలు పూర్తి చేసిన భారతీయ పౌరులు ఖాతా ప్రారంభించవచ్చు. స్వచ్ఛంద పదవీ విరమణ (VRS) పొందిన ఉద్యోగులు 55 సంవత్సరాలు దాటిన తర్వాత కూడా అర్హులు. అయితే రిటైర్మెంట్ ప్రయోజనాలు అందుకున్న తర్వాత నిర్దిష్ట కాలవ్యవధిలో ఖాతా ప్రారంభించాలి. రిటైర్డ్ రక్షణ దళాల సిబ్బంది 50 సంవత్సరాల వయసు నుంచే ఈ పథకంలో చేరవచ్చు.

వ్యక్తిగత ఖాతాతో పాటు జీవిత భాగస్వామితో కలిసి జాయింట్ అకౌంట్ కూడా ప్రారంభించే అవకాశం ఉంటుంది.

నామినీ సదుపాయం కూడా అందుబాటులో ఉంటుంది.

పెట్టుబడి పరిమితి, కాలపరిమితి ఎలా ఉంటాయి?

ఈ పథకంలో కనీస పెట్టుబడి రూ.1,000 నుంచి ప్రారంభించవచ్చు. ప్రస్తుతం గరిష్ఠంగా రూ.30 లక్షల వరకు పెట్టుబడి పెట్టే అవకాశం ఉంది. పథకం కాలపరిమితి 5 సంవత్సరాలు. అయితే మెచ్యూరిటీ తర్వాత మరో 3 సంవత్సరాల పాటు పొడిగించుకునే వెసులుబాటు కూడా ఉంది. అవసరాన్ని బట్టి ఈ పొడిగింపు కోసం దరఖాస్తు చేసుకోవచ్చు. ఒకవేళ కాలపరిమితి పూర్తికాకముందే ఖాతా మూసివేయాలనుకుంటే కొన్ని షరతులు వర్తిస్తాయి. ప్రభుత్వం నిర్ణయించిన నియమాల ప్రకారం కొంత మొత్తం జరిమానా రూపంలో మినహాయింపు ఉంటుంది.

వడ్డీ రేటు, ఆదాయం, పన్ను ప్రయోజనాలు

ఈ పథకానికి ప్రధాన ఆకర్షణ అధిక వడ్డీ రేటు. ప్రస్తుతం SCSSపై ప్రభుత్వం ఏడాదికి 8.2 శాతం వడ్డీ అందిస్తోంది. ఇది సాధారణ సేవింగ్స్ ఖాతాలు, అనేక ఫిక్స్‌డ్ డిపాజిట్లతో పోలిస్తే ఎక్కువగా ఉంటుంది. వడ్డీని ప్రతి మూడు నెలలకు ఒకసారి ఖాతాదారుడి బ్యాంకు లేదా పోస్టాఫీస్ ఖాతాలో జమ చేస్తారు. దీంతో రిటైర్డ్ వ్యక్తులకు క్రమం తప్పకుండా ఆదాయం లభిస్తుంది.