కొన్నిసార్లు ఈ నొప్పి ఛాతీ, వీపు లేదా పక్కటెముకల ప్రాంతంలో గుండెల్లో నొప్పిలా అనిపించే అవకాశం ఉంది. అయితే ఛాతీ నొప్పిని ఎప్పుడూ గ్యాస్ సమస్యగా భావించి నిర్లక్ష్యం చేయకూడదని వైద్య నిపుణులు సూచిస్తున్నారు.

సీనియర్ కన్సల్టెంట్ మెడికల్ గ్యాస్ట్రోఎంటరాలజిస్ట్ డాక్టర్ అనుపమ ఎన్.కె ప్రకారం.. జీర్ణక్రియలో సహజంగానే గ్యాస్ ఉత్పత్తి అవుతుంది. సాధారణంగా ఇది తేన్పులు లేదా అపానవాయువు రూపంలో శరీరం నుంచి బయటకు వెళ్లిపోతుంది. అయితే కొన్ని సందర్భాల్లో పేగుల మలుపుల వద్ద గ్యాస్ చిక్కుకుపోయి బయటకు వెళ్లకుండా ఇబ్బంది పెడుతుంది. దీనినే 'ట్రాప్డ్ గ్యాస్'గా పిలుస్తారు.

గ్యాస్ ఎందుకు పేరుకుపోతుంది?

ఆహారం లేదా పానీయాలు తీసుకునేటప్పుడు గాలిని ఎక్కువగా మింగడం, వేగంగా తినడం, సోడాలు, కార్బొనేటెడ్ డ్రింక్స్ తీసుకోవడం వంటి కారణాలతో పొట్టలో గ్యాస్ పెరగవచ్చు. కొన్ని ఆహార పదార్థాలు కూడా గ్యాస్ ఉత్పత్తికి కారణమవుతాయి.

పేగుల్లోని బ్యాక్టీరియా జీర్ణం కాని కార్బోహైడ్రేట్లను విచ్ఛిన్నం చేసే సమయంలో కూడా గ్యాస్ విడుదలవుతుంది. మలబద్ధకం, లాక్టోస్ ఇంటాలరెన్స్, ఐబీఎస్ వంటి సమస్యలు ఉన్నవారిలో గ్యాస్, ఉబ్బరం మరింత ఇబ్బంది పెట్టవచ్చు.

గ్యాస్ వల్ల నొప్పి ఎందుకు వస్తుంది?

పేగులు సాగదీతకు చాలా సున్నితంగా స్పందిస్తాయి. గ్యాస్ పేగుల మలుపుల వద్ద చిక్కుకుపోయినప్పుడు అక్కడ ఒత్తిడి పెరుగుతుంది. దీంతో పొట్ట ఉబ్బరం, మెలిపెట్టినట్లు లేదా గుచ్చినట్లు నొప్పి కలగవచ్చు.

గ్యాస్ కారణంగా తేన్పులు, అపానవాయువు, కడుపు నిండినట్లు అనిపించడం, పొట్టలో గుడగుడ శబ్దాలు వంటి లక్షణాలు కూడా కనిపించవచ్చు. కొన్ని సందర్భాల్లో నొప్పి ఛాతీ లేదా వీపు ప్రాంతంలో ఉన్నట్లు అనిపించవచ్చు.

గ్యాస్ నుంచి ఉపశమనం పొందాలంటే..

గ్యాస్ సమస్య తరచుగా ఇబ్బంది పెడుతుంటే కొన్ని సాధారణ జీవనశైలి మార్పులు ఉపయోగపడవచ్చు.

భోజనం చేసిన తర్వాత కొద్దిసేపు నడవాలి.

రోజంతా తగినంత నీరు తాగాలి.

ఆహారాన్ని నెమ్మదిగా, బాగా నమిలి తినాలి.

గ్యాస్ కలిగించే ఆహారాలను గుర్తించి వాటిని తగ్గించాలి.

ఒకేసారి ఎక్కువగా తినకుండా చిన్న మొత్తాల్లో ఆహారం తీసుకోవాలి.

స్ట్రాతో పానీయాలు తాగడం, చూయింగ్ గమ్ నమలడం తగ్గించాలి.

రాత్రి భోజనం చేసిన వెంటనే పడుకోకుండా కనీసం 2 గంటల విరామం ఇవ్వాలి.

క్రమం తప్పకుండా నడక, యోగా లేదా ఇతర వ్యాయామాలు చేయాలి.

ఇంట్లో ఏం చేయొచ్చు?

కొంతమందికి వాము లేదా జీలకర్రను గోరువెచ్చని నీటితో తీసుకోవడం వల్ల జీర్ణక్రియకు ఉపశమనం కలగవచ్చు. అల్లంతో తయారు చేసిన టీ కూడా కొందరికి ఉపయోగపడుతుంది. పుదీనా పేగుల కండరాలను సడలించడంలో సహాయపడవచ్చు.

అయితే ఇంటి చిట్కాలతో సమస్య తగ్గకపోతే స్వయంగా మందులు వాడకుండా వైద్యుడిని సంప్రదించడం మంచిది.

ఈ లక్షణాలు ఉంటే వెంటనే వైద్యుడిని కలవాలి

తీవ్రమైన కడుపు లేదా ఛాతీ నొప్పిని కేవలం గ్యాస్‌గా భావించి నిర్లక్ష్యం చేయకూడదు. ఆకస్మికంగా లేదా భరించలేనంత నొప్పి రావడం, వరుసగా వాంతులు కావడం, జ్వరం, మలంలో రక్తం కనిపించడం, పొట్ట బాగా ఉబ్బి గట్టిగా మారడం వంటి లక్షణాలు కనిపిస్తే వెంటనే వైద్య సాయం తీసుకోవాలి.

అలాగే కారణం లేకుండా బరువు తగ్గడం, మలం లేదా గ్యాస్ అస్సలు బయటకు వెళ్లకపోవడం వంటి సమస్యలు ఉన్నా వైద్యుడిని సంప్రదించాలి. ముఖ్యంగా ఛాతీ నొప్పితో పాటు శ్వాస తీసుకోవడంలో ఇబ్బంది ఉంటే దాన్ని గ్యాస్‌గా భావించకుండా అత్యవసర వైద్య సహాయం తీసుకోవడం చాలా ముఖ్యం.