ప్రపంచవ్యాప్తంగా ఎంతో ఆసక్తిగా ఎదురుచూస్తున్న ఈ పుస్తకం నవంబర్ 10న విడుదల కానుంది.

ఇన్‌స్టాగ్రామ్ పోస్ట్‌లో సోనియా ఏమన్నారంటే?

ఖాతా ప్రారంభించిన కొద్ది సేపటికే సోనియా గాంధీకి వేలాది మంది ఫాలోవర్లు చేరారు. ప్రస్తుతం ఆమెను 10,700 మందికి పైగా ఫాలో అవుతుండగా, ఆమె తన పిల్లలు రాహుల్ గాంధీ, ప్రియాంక గాంధీ వాద్రాతో పాటు భారత జాతీయ కాంగ్రెస్ అధికారిక ఖాతాను ఫాలో అవుతున్నారు. తన తొలి పోస్ట్‌లో పుస్తక ముఖచిత్రాన్ని పంచుకుంటూ.. "అందరికీ నమస్కారం, మీ అందరితో ఈ క్షణాన్ని పంచుకుంటున్నందుకు నిజంగా కృతజ్ఞురాలిని. 'బిలాంగింగ్: ఎ జర్నీ ఆఫ్ లవ్' తొలిచూపు ఇది. ఇది ప్రేమ, కర్తవ్యం, నష్టం , మనకు చెందిన ఒక స్థానాన్ని కనుగొనడం గురించిన కథ. దీనిని మీతో పంచుకోవడానికి నేను ఎంతగానో ఎదురుచూస్తున్నాను" అని రాసుకొచ్చారు.

ప్రియాంకతో ఆత్మీయ క్షణాలు

ఇన్‌స్టాగ్రామ్‌లో పోస్ట్ చేసిన వీడియోలో, సోనియా గాంధీ తన పుస్తకం తొలి ప్రతులను అందుకుంటూ ఎంతో సంతోషంగా కనిపించారు. ఈ ఆనందకర సమయంలో ఆమె తన కుమార్తె, కాంగ్రెస్ ఎంపీ ప్రియాంక గాంధీ వాద్రాకు తీపి తినిపించి, ఆత్మీయంగా ఆలింగనం చేసుకున్న దృశ్యాలు నెటిజన్లను ఆకట్టుకుంటున్నాయి.

పుస్తక ప్రచురణ , ప్రి-ఆర్డర్లు

ఈ ఆత్మకథకు సంబంధించిన ప్రీ-ఆర్డర్లు ఇప్పటికే ప్రారంభమయ్యాయి. ప్రపంచవ్యాప్తంగా ఈ పుస్తకాన్ని ఆల్ఫ్రెడ్ ఎ. నాఫ్ ప్రచురిస్తుండగా, భారతదేశంలో హార్పర్‌కాలిన్స్ ఇండియా నవంబర్ 10, 2026న ప్రచురించనుంది. హార్పర్‌కాలిన్స్ ఇండియా సామాజిక మాధ్యమం 'ఎక్స్'లో స్పందిస్తూ.. "మన కాలంలో అత్యంత ఆసక్తిగా ఎదురుచూస్తున్న రాజకీయ ఆత్మకథలలో 'బిలాంగింగ్' ఒకటి. ఇది ప్రేమ, గుర్తింపు, కర్తవ్యం , అనుబంధం గురించిన ఒక నాటకీయమైన, అత్యంత వ్యక్తిగతమైన కథ. భారతదేశ ప్రయాణంపై ఇది ఒక అరుదైన అంతర్గత దృక్పథాన్ని అందిస్తుంది" అని పేర్కొంది.

పెంగ్విన్ ఇండియా స్పష్టత

అంతకుముందు, సంపాదకీయ మార్పులపై వచ్చిన విభేదాల కారణంగా పెంగ్విన్ ఇండియా ఈ పుస్తకాన్ని ప్రచురించడానికి నిరాకరించిందనే వార్తలు వచ్చాయి. అయితే ఈ వార్తలను పెంగ్విన్ రాండమ్ హౌస్ ఇండియా తీవ్రంగా ఖండించింది. తాము ప్రచురణకు ఎప్పుడూ సిద్ధంగానే ఉన్నామని, ప్రచురణ ప్రక్రియలో భాగంగా వాస్తవాలను సరిచూడటం , సలహాలు ఇవ్వడం సాధారణ విషయమని స్పష్టం చేసింది. అయితే, భారతదేశంలో ఈ పుస్తకానికి తాము ప్రచురణకర్తలం కాదని సదరు సంస్థ అధికారిక ప్రకటన విడుదల చేసింది.