ఒకప్పుడు పల్లెలకే పరిమితమైన కోతుల గుంపులు, ఇప్పుడు పట్టణాల్లోనూ హల్‌చల్ చేస్తున్నాయి. తాజాగా ఒక వీధిలోకి ప్రవేశించిన కోతి, అక్కడ ఉన్న వారందరినీ భయభ్రాంతులకు గురిచేయడమే కాకుండా, ఒక వృద్ధురాలిపై నేరుగా దాడికి దిగింది. దీనికి సంబంధించిన వీడియో ప్రస్తుతం నెటిజన్లను షాక్‌కు గురిచేస్తోంది.

నువ్వా-నేనా అన్నట్లు తలపడ్డ వృద్ధురాలు

వైరల్ అవుతున్న వీడియో ప్రకారం.. ఒక వానరం అకస్మాత్తుగా ఇళ్ల మధ్య ఉన్న సందులోకి ప్రవేశించి అక్కడ ఉన్న వారిపై దాడికి ప్రయత్నించింది. ఆ సమయంలో అక్కడ ఉన్న ఒక వృద్ధురాలు భయపడకుండా కోతిని కర్రతో, రాయితో కొట్టి తరిమేందుకు ప్రయత్నించింది. అయితే, ఆ వానరం ఏమాత్రం వెనక్కు తగ్గకుండా "నన్నే కొడతావా?" అన్నట్లుగా ఆమెపై విరుచుకుపడింది.

చీర లాగుతూ బీభత్సం

ఆ కోతి సదరు వృద్ధురాలిపై పలుమార్లు దాడికి దిగింది. ఆమె చీరను గట్టిగా లాగుతూ, కరిచేందుకు ప్రయత్నిస్తూ చుక్కలు చూపించింది. చుట్టుపక్కల వారు కోతిని భయపెట్టేందుకు ప్రయత్నించినప్పటికీ, అది ఏమాత్రం బెదరకుండా భీభత్సం సృష్టించింది. చివరికి జనం పెద్ద సంఖ్యలో గుమిగూడటంతో ఆ వానరం అక్కడి నుంచి నెమ్మదిగా జారుకుంది.

ఆందోళనలో ప్రజలు.. నెటిజన్ల హెచ్చరిక

ఈ వీడియో చూసిన నెటిజన్లు కోతుల దాడుల పట్ల తీవ్ర ఆందోళన వ్యక్తం చేస్తున్నారు. "కోతులతో జాగ్రత్తగా ఉండాలి, అవి కరిస్తే ఆస్పత్రుల చుట్టూ తిరగాల్సి వస్తుంది" అంటూ కామెంట్స్ చేస్తున్నారు. అడవుల్లో పండ్లు, నీరు దొరక్కపోవడంతోనే అవి ఊర్ల మీద పడుతున్నాయని, ప్రభుత్వం వెంటనే స్పందించి కోతులను పట్టుకోవాలని బాధితులు కోరుతున్నారు.