దుబాయ్: కార్మికుల సంక్షేమం, ఆరోగ్య అవగాహన, భద్రతను ప్రోత్సహించే లక్ష్యంతో దుబాయ్ పోలీసులు నిర్వహించిన ఏడు వారాల 'షేడ్ అండ్ రివార్డ్' (Shade and Reward) కార్యక్రమం విజయవంతంగా ముగిసింది.ఈ కార్యక్రమం ద్వారా దుబాయ్లోని పలు కార్మిక వసతి కేంద్రాల్లో పనిచేస్తున్న కార్మికులకు మానవతా సహాయం, ఆరోగ్య సూచనలు, భద్రతా అవగాహన కల్పించారు.
దుబాయ్ పోలీసుల పాజిటివ్ స్పిరిట్ కౌన్సిల్ ఆధ్వర్యంలో నిర్వహించిన ఈ కార్యక్రమం, కార్మికులు పనిచేసే ప్రదేశాలకే వెళ్లి వారికి సేవలు అందించడం ద్వారా యూఏఈ నాయకత్వం ప్రజల సంక్షేమానికి ఇచ్చే ప్రాధాన్యతను మరోసారి చాటింది.
1,275 మంది కార్మికులకు భోజనం, గొడుగులు పంపిణీ
అల్ ఖుసైస్లో నిర్వహించిన ముగింపు కార్యక్రమంలో 1,275 మంది కార్మికులు పాల్గొన్నారు. వారికి భోజనం, గొడుగులు, జ్యూస్లు, శీతల పానీయాలు పంపిణీ చేసి యూఏఈలోని మానవతా విలువలు, సామాజిక బాధ్యతను ప్రతిబింబించేలా కార్యక్రమాన్ని నిర్వహించారు.
సమాజ భాగస్వామ్యానికి నిదర్శనం
ఈ కార్యక్రమానికి ఫెడరల్ నేషనల్ కౌన్సిల్ సభ్యురాలు మోనా ఖలీఫా హమ్మాద్ ముఖ్య అతిథిగా హాజరై, కార్మికులకు నేరుగా వారి పనిస్థలాల్లోనే మానవతా, ఆరోగ్య, విద్యా సేవలు అందించడం అభినందనీయమని అన్నారు.
దుబాయ్ పోలీసుల బాధ్యత కేవలం శాంతిభద్రతల పరిరక్షణకే పరిమితం కాకుండా, ప్రజల జీవన నాణ్యతను మెరుగుపరచడంలో కీలక భాగస్వామిగా మారిందని ఆమె పేర్కొన్నారు.
వేడిగాలుల నుంచి రక్షణపై అవగాహన
ఈ కార్యక్రమాన్ని దుబాయ్ పోలీసుల జనరల్ డిపార్ట్మెంట్ ఆఫ్ హ్యూమన్ రైట్స్, ట్రాఫిక్ విభాగం, అల్ ఖుసైస్ పోలీస్ స్టేషన్, విక్టిమ్ కేర్ సెంటర్, కమ్యూనిటీ హ్యాపీనెస్ విభాగం, ఆపరేషన్స్ విభాగం, అలాగే 'థాంక్ యూ ఫర్ యువర్ వాలంటీరింగ్' బృందం సంయుక్తంగా నిర్వహించాయి.
దుబాయ్ పోలీసుల హెల్త్ సెంటర్కు చెందిన డాక్టర్ అమ్మార్ షాకర్ అల్ బహిందీ కార్మికులకు వేడి కారణంగా కలిగే ఆరోగ్య సమస్యలు, హీట్ ఎగ్జాషన్ లక్షణాలు, నివారణ చర్యలు, తగినంత నీరు తాగడం, మధ్యాహ్న విరామ సమయాలను పాటించడం, ఎండలో ఎక్కువసేపు పనిచేయకుండా జాగ్రత్తలు తీసుకోవడం వంటి అంశాలపై అవగాహన కల్పించారు.
అలాగే పోషకాహారం, తగిన విశ్రాంతి, వృత్తి సంబంధిత ఆరోగ్య, భద్రతా ప్రమాణాలు, అవసరమైనప్పుడు సంబంధిత అధికారులను ఎలా సంప్రదించాలనే విషయాలపై కూడా కార్మికులకు సూచనలు అందించారు.
'ప్రజలే ప్రధానం' అనే సందేశం
పాజిటివ్ స్పిరిట్ కౌన్సిల్ చైర్పర్సన్ ఫాతిమా అహ్మద్ బోహ్జైర్ మాట్లాడుతూ, ఈ కార్యక్రమం విజయవంతం కావడం దుబాయ్ పోలీసులతో పాటు భాగస్వామ్య సంస్థల సమిష్టి కృషికి నిదర్శనమని అన్నారు.
ప్రతి కార్మికుడు యూఏఈ అభివృద్ధిలో కీలక పాత్ర పోషిస్తున్నందున వారికి కృతజ్ఞత తెలియజేయడమే ఈ కార్యక్రమం ప్రధాన ఉద్దేశమని తెలిపారు.మానవతా సహాయంతో పాటు ఆరోగ్య, భద్రతా అవగాహన కల్పించడం ద్వారా సమాజంలో సంక్షేమాన్ని మరింత బలోపేతం చేయాలని లక్ష్యంగా పెట్టుకున్నామని ఆమె పేర్కొన్నారు.