నగరంలో వేగంగా పెరుగుతున్న జనాభా అవసరాలను దృష్టిలో ఉంచుకుని, రాబోయే సంవత్సరాల్లో తొమ్మిది కొత్త మాల్స్‌ మరియు కమ్యూనిటీ రిటైల్ హబ్‌లు ప్రారంభించేందుకు అధికారులు సిద్ధమవుతున్నారు.

ఈ కొత్త రిటైల్ ప్రాజెక్టులు నద్ అల్ షెబా, సోభా హార్ట్‌ల్యాండ్, లివాన్, ది విల్లా, దుబాయ్ సౌత్, ఘాఫ్ వుడ్స్, దుబాయ్ క్రీక్ హార్బర్ వంటి ప్రధాన నివాస ప్రాంతాల్లో ఏర్పాటు కానున్నాయి. స్థానిక ప్రజలకు తమ ప్రాంతానికే సమీపంలో షాపింగ్, వినోదం, ఆరోగ్య సేవలు, ఇతర నిత్యావసర సౌకర్యాలు అందించడమే వీటి ప్రధాన లక్ష్యం.

ఈ ప్రాజెక్టుల్లో తొలి దశగా నద్ అల్ షెబా గార్డెన్స్‌లోని "ది గ్రాండ్" రిటైల్ మరియు లైఫ్‌స్టైల్ డెస్టినేషన్ ఆగస్టు 19 నుంచి దశలవారీగా ప్రారంభం కానుంది. ఇందులో ప్రముఖ రిటైల్ స్టోర్లు, రెస్టారెంట్లు, వెల్‌నెస్ సెంటర్లు, అవసరమైన సేవలతో పాటు నద్ అల్ షెబా ప్రాంతంలో తొలి "వెయిట్‌రోజ్ & పార్ట్నర్స్" సూపర్‌మార్కెట్ కూడా ఏర్పాటు చేయనున్నారు. దీంతో స్థానిక నివాసితులకు మరింత సౌకర్యవంతమైన షాపింగ్ అనుభవం లభించనుంది.

ఇక సోభా మాల్తో పాటు లె మెరియెమ్ కమ్యూనిటీ రిటైల్కు చెందిన రెండు ప్రాజెక్టులు 2026లో పూర్తయ్యే అవకాశం ఉంది. మిగిలిన భారీ రిటైల్ హబ్‌లు అనంతర సంవత్సరాల్లో దశలవారీగా ప్రజలకు అందుబాటులోకి రానున్నాయి.

కమ్యూనిటీ ఆధారిత రిటైల్ మౌలిక సదుపాయాల విస్తరణలో భాగంగా చేపడుతున్న ఈ ప్రాజెక్టులు, ఆధునిక షాపింగ్ అనుభవం, కుటుంబాల కోసం వినోద అవకాశాలు, రోజువారీ సేవలను ఇంటికి చేరువలోనే అందించేలా రూపుదిద్దుకుంటున్నాయి. ఈ కొత్త మాల్స్ ప్రారంభమైన తర్వాత, దుబాయ్ ప్రపంచ స్థాయి రిటైల్ మరియు లైఫ్‌స్టైల్ గమ్యస్థానంగా తన స్థానాన్ని మరింత బలోపేతం చేసుకునే అవకాశం ఉందని అధికారులు భావిస్తున్నారు.