మిడిల్ ఈస్ట్‌లో సుదీర్ఘ కాలంగా సాగుతున్న ఉద్రిక్తతలకు మరింత బలం చేకూరుస్తూ ఇజ్రాయెల్ రక్షణ దళాలు (IDF) శుక్రవారం రాత్రి గాజా సిటీలో అతిపెద్ద వైమానిక దాడిని విజయవంతంగా పూర్తి చేశాయి.

అక్టోబర్ 7 ఇజ్రాయెల్ దాడుల మాస్టర్‌మైండ్లలో ఒకడైన, ప్రస్తుత హమాస్ మిలిటరీ కమాండర్-ఇన్-చీఫ్ ఇజ్ అల్-దిన్ అల్-హద్దాద్‌ను లక్ష్యంగా చేసుకుని ఈ దాడులు జరిగాయి. గాజా సిటీలోని అల్-రిమాల్ ప్రాంతంలో ఉన్న ఒక నివాస సముదాయం, వాహనంపై ఇజ్రాయెల్ ఫైటర్ జెట్లు మూడు వైమానిక బాంబుల వర్షం కురిపించాయి. ఈ దాడిలో హద్దాద్‌తో పాటు అతని కుటుంబ సభ్యులు, అనుచరులతో కలిపి మొత్తం ఏడుగురు మరణించినట్లు పాలస్తీనా రెడ్ క్రాస్ హెల్త్ సంస్థ ధృవీకరించింది.

గతంలో ఇజ్రాయెల్ జరిపిన ఆరు హత్యాయత్నాల నుండి తప్పించుకుని 'ది ఘోస్ట్'గా పేరొందిన హద్దాద్ మరణాన్ని హమాస్ సైతం అధికారికంగా అంగీకరించింది. అమెరికా అధ్యక్షుడు డొనాల్డ్ ట్రంప్ చొరవతో కుదిరిన అక్టోబర్ 2025 శాంతి ఒప్పందాన్ని తోసిపుచ్చి, ఇజ్రాయెల్‌పై మరిన్ని దాడులకు ప్రణాళికలు సిద్ధం చేస్తున్నాడనే పక్కా ఇంటెలిజెన్స్ సమాచారంతోనే ఈ దాడి చేసినట్లు ప్రధాని నెతన్యాహు స్పష్టం చేశారు. ఎల్లప్పుడూ ఇజ్రాయెల్ బందీలను హ్యూమన్ షీల్డ్‌గా వాడుకునే హద్దాద్ మరణంతో, హమాస్ మిలిటరీ కమాండ్ స్ట్రక్చర్ పూర్తిగా కుప్పకూలిందని అంతర్జాతీయ రక్షణ రంగ నిపుణులు విశ్లేషిస్తున్నారు.