వేసవి సెలవుల సీజన్‌లో ఆన్‌లైన్ మోసాల పై అప్రమత్తంగా ఉండాలని సూచన

దుబాయ్: వేసవి సెలవులు, హాలిడే సీజన్‌ను లక్ష్యంగా చేసుకుని పెరుగుతున్న నకిలీ ట్రావెల్ ఆఫర్లు, ఫేక్ బుకింగ్ మోసాలపై దుబాయ్ పోలీసులు ప్రజలను అప్రమత్తం చేశారు.

"బీ అవేర్ ఆఫ్ ఫ్రాడ్" ప్రచార కార్యక్రమంలో భాగంగా ఈ హెచ్చరికలు జారీ చేశారు.

దుబాయ్ పోలీసుల క్రిమినల్ ఇన్వెస్టిగేషన్ విభాగంలోని యాంటీ-ఫ్రాడ్ సెంటర్ తెలిపిన వివరాల ప్రకారం, మోసగాళ్లు నకిలీ వెబ్‌సైట్లు, ఫేక్ సోషల్ మీడియా ఖాతాలు సృష్టించి అంతర్జాతీయ టూరిస్టు ప్రాంతాలకు తక్కువ ధరల్లో ట్రావెల్ ప్యాకేజీలు, హోటల్ బుకింగ్‌లు, విమాన టికెట్లు అందిస్తున్నట్లు ప్రకటనలు ఇస్తున్నారు.

మార్కెట్ ధరల కంటే చాలా తక్కువ ధరలు చూపిస్తూ ప్రజలను ఆకర్షించి, వెంటనే డబ్బులు పంపించాలని ఒత్తిడి తెస్తున్నారని పోలీసులు తెలిపారు. కొన్ని మోసగాళ్లు ప్రముఖ టూరిజం కంపెనీలు, లైసెన్స్ పొందిన ట్రావెల్ ఏజెన్సీల పేర్లు, లోగోలు ఉపయోగించి తమ ప్రకటనలకు నమ్మకాన్ని కల్పించే ప్రయత్నం చేస్తున్నారని వెల్లడించారు.

వాట్సాప్, ఫోన్ కాల్స్ ద్వారా "సీట్లు పరిమితం", "కొద్ది గంటల్లో ఆఫర్ ముగుస్తుంది" అంటూ బాధితులను త్వరగా బుకింగ్ చేయాలని ఒత్తిడి చేస్తున్నట్లు గుర్తించారు.

డబ్బులు వ్యక్తిగత ఖాతాలకు లేదా అనుమానాస్పద లింక్‌లకు పంపిన తర్వాత చాలా మంది బాధితులు టికెట్లు, హోటల్ బుకింగ్‌లు అసలే లేవని తెలుసుకుంటున్నారని పోలీసులు పేర్కొన్నారు. దీంతో ఆర్థిక నష్టం మాత్రమే కాకుండా కుటుంబ విహారయాత్రల ప్రణాళికలు కూడా దెబ్బతింటున్నాయని తెలిపారు.

ప్రజలు అనుమానాస్పద ప్రకటనలు, అసాధారణంగా తక్కువ ధరల ఆఫర్లకు ఆకర్షితులు కాకూడదని పోలీసులు సూచించారు. కేవలం లైసెన్స్ పొందిన, అధికారికంగా గుర్తింపు ఉన్న ట్రావెల్ కంపెనీలు, విశ్వసనీయ ఆన్‌లైన్ వేదికల ద్వారానే బుకింగ్‌లు చేసుకోవాలని సూచించారు.