తన వ్యక్తిత్వ హక్కులను కాపాడుకోవాలని కోరుతూ అల్లు అర్జున్ దాఖలు చేసిన పిటిషన్‌పై విచారణ చేపట్టిన జస్టిస్ తుషార్ రావు గెడెల ఈ కీలక తీర్పును వెలువరించారు. దీనివల్ల ఇకపై అల్లు అర్జున్ అనుమతి లేకుండా ఆయనకు సంబంధించిన ఎలాంటి గుర్తులను వ్యాపారాల కోసం వాడటానికి వీలుండదు.

ఆ స్పెషల్ స్టైల్ అల్లు అర్జున్ సొంతమే..
కోర్టు తన తీర్పులో స్పష్టమైన వ్యాఖ్యలు చేసింది. అల్లు అర్జున్ పేరు, ఆయన రూపం, మాట్లాడే విధానం, సినిమాల్లో ఆయన పలికే సంభాషణలు, సిగ్నేచర్ స్టెప్పులు మరియు హావభావాలు అన్నీ ఆయనకే ప్రత్యేకమని కోర్టు పేర్కొంది. ఇవి కేవలం నటనకు సంబంధించినవి మాత్రమే కాదని, ఆయన కష్టంతో సంపాదించుకున్న వ్యక్తిత్వ హక్కులని జస్టిస్ తుషార్ రావు స్పష్టం చేశారు. ఆయన సంతకం, వస్త్రధారణ మరియు మాటతీరు కూడా కాపీరైట్ పరిధిలోకి వస్తాయని, వీటిని ఉపయోగించుకునే హక్కు కేవలం ఆయనకు మాత్రమే ఉంటుందని కోర్టు తేల్చి చెప్పింది.

అనుమతి లేకుండా వాడుకుంటే చర్యలు తప్పవు
చాలామంది వ్యాపారులు సెలబ్రిటీల ఫోటోలను లేదా డైలాగులను టీ షర్టులు, వస్తువులపై ముద్రించి లాభాలు గడిస్తుంటారు. అయితే, అల్లు అర్జున్ అనుమతి లేకుండా ఇలాంటి పనులు చేయడం చట్టరిత్యా నేరమని కోర్టు హెచ్చరించింది. తన గుర్తింపును ఇతరులు వాడుకుని ఆర్థిక ప్రయోజనం పొందడాన్ని అల్లు అర్జున్ వ్యతిరేకించగా, కోర్టు ఆయన వాదనతో ఏకీభవించింది. దీనివల్ల ఆయన ప్రతిష్టకు భంగం కలగకుండా రక్షణ లభించినట్లయింది.

స్టార్ హీరోల జాబితాలో అల్లు అర్జున్
వ్యక్తిత్వ హక్కుల పరిరక్షణ కోసం కోర్టును ఆశ్రయించి విజయం సాధించిన ప్రముఖుల జాబితాలో అల్లు అర్జున్ కూడా చేరారు. గతంలో చిరంజీవి, నాగార్జున, జూనియర్ ఎన్టీఆర్ మరియు మలయాళ స్టార్ మోహన్ లాల్ వంటి వారు కూడా తమ హక్కుల కోసం ఇలాంటి ఉత్తర్వులను పొందారు. ఇప్పుడు అల్లు అర్జున్ కూడా అదే బాటలో నిలిచి, తన బ్రాండ్ వాల్యూను మరియు తన ప్రత్యేకమైన గుర్తింపును కాపాడుకోవడంలో సఫలమయ్యారు.