‘పేదల సేవలో’ కార్యక్రమంలో పాల్గొన్న ఆయన, రాష్ట్ర సంక్షేమం, అభివృద్ధి ప్రయాణం, నీటి ప్రాజెక్టులు, మహిళా సాధికారత అంశాలపై ప్రసంగించారు. ప్రజల కోసమే కూటమి ఏర్పడిందని, కేంద్ర ప్రభుత్వ సహకారంతో రాష్ట్రాన్ని విధ్వంసం నుంచి వికాసం వైపు నడిపిస్తున్నామని స్పష్టం చేశారు.

సంక్షేమం - మహిళా సాధికారత..

దేశంలో ఎక్కడా లేని విధంగా పింఛన్ల మొత్తాన్ని పెంచామని, ఇప్పటివరకు పింఛన్ల రూపంలోనే రూ.73,000 కోట్లు అందించామని తెలిపారు. మొత్తం సంక్షేమానికి రూ.1.50 లక్షల కోట్లు ఖర్చు చేశామన్నారు.

మహిళల ప్రయాణ సౌలభ్యం కోసం త్వరలోనే పెద్ద ఎత్తున ఏసీ బస్సులను ప్రవేశపెడుతున్నామని, సాధారణ బస్సులతో పాటు ఏసీ బస్సుల్లోనూ మహిళలకు ఉచిత ప్రయాణ సదుపాయం కల్పిస్తామని ప్రకటించారు.

గతంలో మహిళలకు 33% రిజర్వేషన్లు, ఆర్టీసీలో మహిళా కండక్టర్ల వ్యవస్థను తానే తీసుకొచ్చానని గుర్తుచేస్తూ, త్వరలోనే మహిళా డ్రైవర్ల వ్యవస్థను కూడా అందుబాటులోకి తెస్తామని వెల్లడించారు. ఆడబిడ్డల కష్టాలు తీర్చేందుకే ‘దీపం’ పథకం కింద ఉచిత గ్యాస్ సిలిండర్లను అందిస్తున్నట్లు చెప్పారు.

మెగా డీఎస్సీపై కుట్రలను తిప్పికొట్టాం..

గిరిజన, పేద విద్యార్థులకు విద్య అందకుండా వైసీపీ అనేక అడ్డంకులు సృష్టించిందని, మెగా డీఎస్సీని అడ్డుకోవడానికి ఏకంగా 350 కేసులు వేసినా పారదర్శకంగా ఉద్యోగ నియామకాలు పూర్తి చేశామన్నారు.

మెరిట్ ఆధారంగా పారదర్శకంగా ఉద్యోగాలు ఇస్తే తప్పుడు విమర్శలు చేస్తున్నారని, ఉద్యోగాలు సాధించిన టీచర్లే స్వయంగా రోడ్డెక్కి విపక్షాల తీరును తప్పుబడుతున్నారని పేర్కొన్నారు.

ఉత్తరాంధ్రకు గోదావరి జలాలు - నదుల అనుసంధానం..

• వెలిగొండ ప్రాజెక్ట్ సాకారం:

  రూ.4,000 కోట్ల వ్యయంతో వెలిగొండ ప్రాజెక్ట్‌ను పూర్తి చేసి మార్కాపురం జిల్లా వాసుల దశాబ్దాల తాగు, సాగునీటి కలను నెరవేర్చామని తెలిపారు.

• అనకాపల్లి, విశాఖకు గోదావరి నీరు:

  కొండలు, గుట్టలను తొలిచి గోదావరి జలాలను ఉత్తరాంధ్రకు తరలిస్తున్నామని.. అనకాపల్లికి గోదావరి నీటిని విడుదల చేసి, వచ్చే ఏడాది నాటికి విశాఖపట్నానికి గోదావరి జలాలు అందిస్తామని ప్రకటించారు. భవిష్యత్‌లో గోదావరి – కావేరి నదుల అనుసంధానం చేపట్టి శాశ్వతంగా నీటి కష్టాలు తీరుస్తామన్నారు.

పెట్టుబడులు - విద్యుత్ రంగం - సామాజిక న్యాయం..

• రూ.22 లక్షల కోట్ల పెట్టుబడులు:

  గత ప్రభుత్వం పరిశ్రమలను తరిమేస్తే, కూటమి ప్రభుత్వం అధికారంలోకి వచ్చిన తర్వాత లక్షల కోట్ల పెట్టుబడులను రాష్ట్రానికి ఆకర్షించగలిగిందని చెప్పారు.

• విద్యుత్ ఛార్జీల భారం లేదు:

  గత ప్రభుత్వ హయాంలో 9 సార్లు విద్యుత్ ఛార్జీలు పెంచి ప్రజలపై భారం మోపగా, తాము అధికారంలోకి వచ్చాక ఒక్క రూపాయి కూడా ఛార్జీలు పెంచలేదని, సౌర విద్యుత్‌ను ప్రోత్సహిస్తున్నామని స్పష్టం చేశారు.

• వెనుకబడిన వర్గాలకు చేయూత:

  దశాబ్దాలుగా టీడీపీని అంటిపెట్టుకున్న వెనుకబడిన వర్గాల అభ్యున్నతి కోసం వడ్డెర సామాజిక వర్గానికి మైనింగ్ లీజులు, గౌడ కులస్తులకు మద్యం షాపుల కేటాయింపుల్లో ప్రాధాన్యం కల్పిస్తున్నామని తెలిపారు.