తెదేపా మహానాడు వేదికగా ఆయన కార్యకర్తలను ఉద్దేశించి ఎంతో భావోద్వేగంగా మాట్లాడారు. పార్టీ సాధించిన ప్రతి విజయం వెనుక కార్యకర్తల కష్టం ఉందన్న ఆయన.. రాత్రి పగలు తేడా లేకుండా శ్రమించిన ప్రతి ఒక్కరికీ తాను ఎల్లప్పుడూ రుణపడి ఉంటానని స్పష్టం చేశారు.

కార్యకర్తల సంక్షేమం కోసం తమ ప్రభుత్వం ఎల్లప్పుడూ అండగా ఉంటుందని సీఎం చంద్రబాబు భరోసా ఇచ్చారు. వారి భద్రతను దృష్టిలో పెట్టుకుని, బీమా సౌకర్యం కోసం ప్రభుత్వం ఇప్పటివరకు రూ.150 కోట్లు ఖర్చు చేసినట్లు ఈ సందర్భంగా వెల్లడించారు. కష్టకాలంలో పార్టీని నమ్ముకుని ఉన్న ప్రతి కార్యకర్తను తాము గుండెల్లో పెట్టుకుని చూసుకుంటామని ఆయన హామీ ఇచ్చారు.

రాష్ట్ర ఆర్థిక పరిస్థితిపై కూడా ముఖ్యమంత్రి కీలక వ్యాఖ్యలు చేశారు. గత ప్రభుత్వ తప్పుడు విధానాల వల్ల ఆంధ్రప్రదేశ్ ఆర్థిక వ్యవస్థ పూర్తిగా కుప్పకూలిపోయిందని విమర్శించారు. వెంటిలేటర్‌పై ఉన్న రాష్ట్ర ఆర్థిక పరిస్థితికి, కేంద్ర ప్రభుత్వ సహకారంతో తాము ఆక్సిజన్ అందించి మళ్లీ సరైన దారిలోకి తీసుకువచ్చామని వివరించారు. ఏపీ అభివృద్ధి కోసం ప్రధానమంత్రి నరేంద్ర మోదీ పూర్తి స్థాయిలో సహకరిస్తున్నారని, అందుకు ఆయనకు ప్రత్యేక కృతజ్ఞతలు తెలుపుతున్నట్లు చెప్పారు.

తమ ప్రభుత్వ సమర్థవంతమైన పాలన, పారిశ్రామిక విధానాల వల్లే రాష్ట్రానికి పెట్టుబడులు వరదలా వస్తున్నాయని చంద్రబాబు సగర్వంగా ప్రకటించారు. కూటమి ప్రభుత్వం అధికారంలోకి వచ్చిన కేవలం 23 నెలల స్వల్ప కాలంలోనే రాష్ట్రానికి రూ.23 లక్షల కోట్ల భారీ పెట్టుబడులను ఆకర్షించగలిగామని సీఎం వెల్లడించారు. ఈ పెట్టుబడుల ద్వారా రాష్ట్రంలో యువతకు పెద్ద ఎత్తున ఉద్యోగ, ఉపాధి అవకాశాలు లభిస్తాయని ముఖ్యమంత్రి చంద్రబాబు నాయుడు ఆశాభావం వ్యక్తం చేశారు.