IBOMMA: తెలుగు చలనచిత్ర పరిశ్రమను పట్టిపీడిస్తున్న పైరసీ భూతంపై 'తెలుగు ఫిల్మ్ ఛాంబర్ ఆఫ్ కామర్స్' మరోసారి గట్టి చర్యలు చేపట్టింది.
ఇటీవల థియేటర్లలో విడుదలైన సరికొత్త సినిమాలను అక్రమంగా డిజిటల్ ప్లాట్ఫారమ్స్లో అప్లోడ్ చేస్తున్న పైరసీ వెబ్సైట్లు 'ఐబొమ్మ' (iBomma), 'బప్పం' (Bappam) లపై ఫిల్మ్ ఛాంబర్ ప్రతినిధులు హైదరాబాద్లోని సైబర్ క్రైమ్ పోలీసులకు అధికారికంగా ఫిర్యాదు చేశారు. ఈ ఫిర్యాదు ఆధారంగా సైబర్ క్రైమ్ పోలీసులు సదరు వెబ్సైట్ల నిర్వాహకులపై కేసు నమోదు చేసి దర్యాప్తు ప్రారంభించారు.
పేరు మార్చి కేటుగాళ్ల కొత్త దందా
గతంలో 'ఐబొమ్మ' వెబ్సైట్ సర్వీసులను పూర్తిగా నిలిపివేస్తున్నట్లు దాని పాత నిర్వాహకులు ప్రకటించిన సంగతి తెలిసిందే. అయితే, ఆ పాపులర్ పేరును వాడుకుని కొందరు కేటుగాళ్లు ఇంటర్నెట్లో కొత్తగా ఒక నకిలీ వెబ్సైట్ను క్రియేట్ చేశారు. దీనిపై ఐబొమ్మతో గతంలో సంబంధం ఉన్న రవి అనే వ్యక్తి స్పందిస్తూ.. ప్రస్తుతం అందుబాటులోకి వచ్చిన కొత్త 'ఐబొమ్మ' వెబ్సైట్తో తనకు ఎలాంటి సంబంధం లేదని స్పష్టం చేశారు. కేవలం పాత బ్రాండ్ పేరును వాడుకుని కొందరు సైబర్ నేరగాళ్లు ఈ అక్రమ నెట్వర్క్ను నడుపుతున్నారని ఆయన వెల్లడించారు.
నిర్మాతలకు భారీ నష్టం
ఇటీవల టాలీవుడ్లో విడుదలైన పెద్ద, చిన్న సినిమాల డిజిటల్ కాపీలను ఈ కేటుగాళ్లు వెంటనే తమ వెబ్సైట్లలో పెట్టేస్తున్నారు. ఐబొమ్మతో పాటు 'బప్పం' అనే మరో వెబ్సైట్ కూడా సరికొత్త చిత్రాలను ఉచితంగా స్ట్రీమింగ్ చేస్తూ చిత్ర నిర్మాతల పొట్ట కొడుతోంది. దీనివల్ల థియేటర్లకు వచ్చే ప్రేక్షకులకు సంఖ్య తగ్గిపోవడమే కాకుండా, సినిమా కలెక్షన్లపై తీవ్ర ప్రభావం పడుతోందని ఫిల్మ్ ఛాంబర్ ఆవేదన వ్యక్తం చేసింది. కోట్ల రూపాయల బడ్జెట్తో నిర్మించిన సినిమాలు ఇలా పైరసీ బారిన పడటం వల్ల ఇండస్ట్రీ మొత్తం నష్టపోతోందని పేర్కొంది.
దర్యాప్తు ముమ్మరం చేసిన పోలీసులు
ఫిల్మ్ ఛాంబర్ ఇచ్చిన ఫిర్యాదును తీవ్రంగా పరిగణించిన సైబర్ క్రైమ్ పోలీసులు ఐబొమ్మ, బప్పం వెబ్సైట్ల ఐపీ అడ్రస్లు, వాటిని హోస్ట్ చేసిన సర్వర్ల వివరాలను సేకరిస్తున్నారు. ఈ వెబ్సైట్ల డొమైన్లను పూర్తిగా బ్లాక్ చేయడంతో పాటు, వీటి వెనుక ఉన్న అసలు సూత్రధారులను పట్టుకునేందుకు సాంకేతిక నిపుణుల సహాయం తీసుకుంటున్నారు. సినిమా పైరసీకి పాల్పడటం, అక్రమంగా సినిమాలను డౌన్లోడ్ చేయడం చట్టరీత్యా నేరమని, ఇటువంటి వెబ్సైట్లను నడిపేవారిపై కఠిన చర్యలు తీసుకుంటామని పోలీసులు హెచ్చరించారు.