Pawan Kalyan: ఆంధ్రప్రదేశ్ ఉపముఖ్యమంత్రి, జనసేన అధినేత పవన్ కళ్యాణ్ హైదరాబాద్‌లోని గచ్చిబౌలిలో నిర్వహించ తలపెట్టిన 'తెలంగాణ నవ నిర్మాణ సంకల్ప సభ'కు చట్టపరంగా పెద్ద బ్రేక్ పడింది.

ఈ సభకు కాంగ్రెస్ ప్రభుత్వం, పోలీసులు అనుమతి నిరాకరించిన నేపథ్యంలో జనసేన నాయకులు తెలంగాణ హైకోర్టును ఆశ్రయించినప్పటికీ, అక్కడ కూడా పార్టీకి నిరాశే ఎదురైంది.

హైకోర్టులో జనసేనకు నిరాశ.. హౌస్ మోషన్ పిటిషన్ తిరస్కరణ!

తెలంగాణ ఆవిర్భావ దినోత్సవం సందర్భంగా గచ్చిబౌలి వేదికగా భారీ బహిరంగ సభను నిర్వహించాలని జనసేన భావించింది. అయితే, శాంతిభద్రతలు ఇంకా ఇతర సాంకేతిక కారణాలను చూపుతూ పోలీసులు ఈ సభకు పర్మిషన్ ఇవ్వలేదు. పోలీసుల నిర్ణయాన్ని సవాల్ చేస్తూ జనసేన లీగల్ టీమ్ అత్యవసరంగా హైకోర్టులో 'హౌస్ మోషన్ పిటిషన్' (House Motion Petition) దాఖలు చేసింది.

ఈ పిటిషన్‌పై విచారణ చేపట్టిన గౌరవ హైకోర్టు.. పవన్ కళ్యాణ్ సభకు అనుమతి ఇచ్చేందుకు నిరాకరించింది. జనసేన దాఖలు చేసిన పిటిషన్‌ను కోర్టు కొట్టివేయడంతో, ఇవాళ సాయంత్రం జరగాల్సిన తెలంగాణ నవ నిర్మాణ సంకల్ప సభ అధికారికంగా రద్దయినట్లయింది.

సభ రద్దు.. కానీ జూబ్లీహిల్స్ నివాసం నుండి పవన్ ‘లైవ్’ ప్రెస్ మీట్!

కోర్టు నుంచి అనుమతి లభించకపోవడంతో జనసేన శ్రేణులు తీవ్ర నిరాశకు గురైనప్పటికీ, అధినేత పవన్ కళ్యాణ్ వెనక్కి తగ్గడం లేదు. సభ వేదికగా ప్రజలనుద్దేశించి చెప్పాలనుకున్న అంశాలను మీడియా ముఖంగా పంచుకోవడానికి ఆయన సిద్ధమయ్యారు.