అత్యంత పారదర్శకంగా, వేగంగా సాగుతున్న ఈ ప్రక్రియలో భాగంగా ప్రభుత్వం కేవలం ఐదు రోజుల్లోనే రాష్ట్రవ్యాప్తంగా సాగుభూమి కలిగిన లక్షలాది మంది అన్నదాతల బ్యాంక్ ఖాతాల్లోకి నేరుగా నిధులను బదిలీ చేసింది. ఇచ్చిన మాట ప్రకారం సాగు ఖర్చుల భారాన్ని తగ్గించి, రైతాంగానికి ఆర్థిక భరోసా కల్పించడమే ధ్యేయంగా ఈ నిధులను విడుదల చేస్తున్నట్లు రాష్ట్ర వ్యవసాయ శాఖ మంత్రి తుమ్మల నాగేశ్వరరావు స్పష్టం చేశారు.

అధికారిక నివేదికల ప్రకారం, ఈ విడత నిధుల విడుదలలో భాగంగా 5 నుండి 6 ఎకరాల వరకు సాగుభూమి కలిగిన 1.68 లక్షల మందికి పైగా రైతుల ఖాతాల్లో ప్రభుత్వం రూ. 545.40 కోట్లను విజయవంతంగా జమ చేసింది. జూన్ 30న ప్రారంభమైన ఈ పెట్టుబడి సాయం పంపిణీ ప్రక్రియ.. ప్రతిరోజూ భూమి విస్తీర్ణం ఆధారంగా క్రమబద్ధంగా సాగుతూ కేవలం ఐదు రోజుల్లోనే 6 ఎకరాల పరిధి వరకు ఉన్న రైతులందరికీ చేరింది. ఇప్పటివరకు మొత్తం 1.18 కోట్లకు పైగా ఎకరాల సాగుభూమికి గాను, 67.44 లక్షల మంది లబ్ధిదారులైన రైతుల ఖాతాల్లో రూ. 7,135.77 కోట్ల నిధులను ప్రభుత్వం జమ చేయడం గమనార్హం.

ఈ పెట్టుబడి సాయం పంపిణీ ప్రక్రియ మొదటి రోజున ఒకటి నుండి రెండు ఎకరాల లోపు ఉన్న దాదాపు 44.27 లక్షల మంది రైతులకు రూ. 2,482 కోట్లకు పైగా నిధులను విడుదల చేయడంతో ప్రారంభమైంది. ఆ తర్వాతి రోజుల్లో వరుసగా 3 ఎకరాలు, 4 ఎకరాలు, 5 ఎకరాల వరకు సాగుభూమి కలిగిన లక్షలాది మంది రైతుల ఖాతాల్లో విడతల వారీగా వందలాది కోట్ల రూపాయలను ప్రభుత్వం జమ చేసుకుంటూ వచ్చింది. కాగా, మిగిలిన విస్తీర్ణం కలిగిన అర్హులైన రైతులందరికీ కూడా రాబోయే రోజుల్లో విడతల వారీగా నిధులను విడుదల చేయడానికి అధికారులు కసరత్తు పూర్తి చేశారు.