సంతానలేమి అనేది ఈ రోజుల్లో చాలామందిని వేధిస్తున్న పెద్ద సమస్య. అయితే పిల్లలు కలగకపోవడానికి కేవలం శారీరక సమస్యలే కాదు మన లైఫ్ స్టైల్ ముఖ్యంగా మనం తినే ఆహారం కూడా ఒక ముఖ్య కారణం అని చాలామందికి తెలియదు.
మనం తీసుకునే కొన్ని రకాల పోషకాలు ఫెర్టిలిటీని (సంతానోత్పత్తి సామర్థ్యం) పెంచడంలో ఎలా సహాయపడతాయో ఇప్పుడు చూద్దాం.
యాంటీ ఆక్సిడెంట్లు ముఖ్యం: మనం రోజువారీ తినే ఆహారంలో యాంటీ ఆక్సిడెంట్లు ఎక్కువగా ఉండేలా చూసుకోవాలి. ఇవి శరీరంలోని కణాలను దెబ్బతినకుండా కాపాడతాయి. ముఖ్యంగా పురుషుల్లో వీర్యకణాల నాణ్యతను, స్త్రీలలో అండాల ఆరోగ్యాన్ని మెరుగుపరచడానికి ఇవి బాగా హెల్ప్ చేస్తాయి. ఇక ఇందుకోసం రోజూ రంగురంగుల పండ్లు, ఆకుకూరలు బెర్రీలు, నట్స్ (బాదం, వాల్నట్స్) వంటివి డైట్లో చేర్చుకోవాలి.
హెల్తీ ఫ్యాట్స్ (మంచి కొవ్వులు): చాలామంది ఫ్యాట్స్ అనగానే భయపడతారు. కానీ శరీరానికి ‘ఒమేగా-3 ఫ్యాటీ యాసిడ్స్’ వంటి మంచి కొవ్వులు చాలా అవసరం. ఇవి హార్మోన్ల సమతుల్యతను (హార్మోనల్ బ్యాలెన్స్) కాపాడుతాయి. చేపలు, అవకాడో, గుడ్లు, మరియు నెయ్యి వంటి వాటిలో ఈ మంచి కొవ్వులు లభిస్తాయి. ఇవి గర్భధారణ అవకాశాలను పెంచడానికి దోహదం చేస్తాయి.
ప్లాంట్ ప్రొటీన్లు బెటర్: చికెన్, మటన్ వంటి యానిమల్ ప్రొటీన్ల కంటే పప్పుధాన్యాలు, శనగలు, బఠానీలు, సోయా వంటి ప్లాంట్ ప్రొటీన్లను ఎక్కువగా తీసుకోవడం వల్ల స్త్రీలలో ఓవ్యులేషన్ (అండం విడుదలయ్యే ప్రక్రియ) సమస్యలు తగ్గుతాయని పరిశోధనలు చెబుతున్నాయి. ఇక కాబట్టి వారంలో కనీసం రెండు మూడు సార్లయినా పప్పులను ఆహారంలో భాగంగా చేసుకోవడం మంచిది.
వేటికి దూరంగా ఉండాలి?: మంచి ఆహారం తినడంతో పాటు కొన్ని చెడు అలవాట్లకు దూరంగా ఉండాలి. బేకరీ ఫుడ్స్, కూల్ డ్రింక్స్, ప్యాక్ చేసిన జంక్ ఫుడ్లో ఉండే ‘ట్రాన్స్ ఫ్యాట్స్’ ఫెర్టిలిటీని దెబ్బతీస్తాయి. అలాగే అతిగా కాఫీ తాగడం (కెఫిన్), ధూమపానం, మద్యం సేవించడం వల్ల కూడా సంతానోత్పత్తి సామర్థ్యం పడిపోతుంది.
మనం ప్లేట్లో పెట్టుకునే ఆహారమే మన ఆరోగ్యాన్ని డిసైడ్ చేస్తుంది. పోషకాలతో కూడిన సమతుల్య ఆహారం తినడం, రోజూ కాస్త వ్యాయామం చేయడం, ఒత్తిడిని తగ్గించుకోవడం ద్వారా ఫెర్టిలిటీ రేటును సహజంగానే పెంచుకోవచ్చు. హెల్తీగా తినండి, హ్యాపీగా ఉండండి.