ఈ ఉరుకుల పరుగుల జీవితంలో అందరూ బిజీ అయిపోయారు. పొద్దున్నే లేచింది మొదలు రాత్రి పడుకునే వరకు ఏదో ఒక టెన్షన్. ఈ హడావుడిలో మనకోసం ప్రాణమిచ్చే కుటుంబాన్ని పట్టించుకోవడం మర్చిపోతున్నాం.

మరి, వెనుక ఒక ఫ్యామిలీ సపోర్ట్ ఉండటం ఎంత అవసరమో, అసలు ఈ మే 15 అంతర్జాతీయ కుటుంబ దినోత్సవం విశిష్టత ఏంటో చూసేద్దాం రండి..

ఒంటరితనాన్ని దూరం చేసే కొండంత అండ: ఈ రోజుల్లో సక్సెస్ కోసం అందరూ ఒంటరిగా పోరాడుతున్నారు. కానీ, ఎంత సంపాదించినా రోజు ముగిసేసరికి మన బాధను పంచుకోవడానికి, మనల్ని ఓదార్చడానికి ఫ్యామిలీ ఉండాలి. ఇక మనం గెలిచినా, ఓడినా మన పక్కనే ఉండేది మన కుటుంబం మాత్రమే. ఆ నమ్మకమే మనల్ని లైఫ్‌లో ముందుకు నడిపిస్తుంది.

బిజీ లైఫ్‌లో మిస్ అవుతున్న బంధాలు: ఆఫీస్ వర్క్, ఫోన్లు, సోషల్ మీడియాల వల్ల ఒకే ఇంట్లో ఉంటున్నా ఎవరి లోకంలో వారు ఉంటున్నారు. ఇక పిల్లలతో మాట్లాడే టైం, పెద్దల అనుభవాలు వినే ఓపిక తగ్గిపోతున్నాయి. కానీ, కుటుంబ సభ్యులతో గడిపే చిన్న చిన్న క్షణాలే మన మనసుకు ఎంతో ప్రశాంతతను ఇస్తాయి.

ఈ రోజైనా ఫోన్లు పక్కన పెడదామా?: కనీసం ఈ రోజైనా (మే 15) కాసేపు ఫోన్లు, ల్యాప్‌టాప్‌లు పక్కన పెట్టి ఫ్యామిలీతో సరదాగా గడుపుదాం. అందరూ కలిసి భోజనం చేస్తూ పాత జ్ఞాపకాలను గుర్తుచేసుకుందాం.ఇక వీలైతే ఒక చిన్న గిఫ్ట్ ఇచ్చి, “నువ్వంటే నాకు ఇష్టం” అని మనసు విప్పి చెబుదాం.