మన శరీరంలో రక్తం (హిమోగ్లోబిన్) సరిగ్గా ఉండాలంటే ఐరన్ చాలా అవసరం. ఐరన్ తగ్గితే కేవలం నీరసమే కాదు, విపరీతమైన అలసట జుట్టు రాలడం తలతిరగడం ఏకాగ్రత లోపించడం వంటి సమస్యలు వస్తాయి.
ముఖ్యంగా వేసవి కాలంలో ఎండల వల్ల సరిగ్గా తినకపోవడం కూల్ డ్రింక్స్ పైనే ఆధారపడటం వల్ల ఐరన్ లోపం ఇంకా ఎక్కువవుతుంది. అందుకే రక్తాన్ని పెంచే ఆ 7 సూపర్ ఫుడ్స్ ఏంటో ఇప్పుడు చూద్దాం.
పాలకూర, బాదం కంటే ఇవే బెస్ట్: మనం సాధారణంగా ఐరన్ అనగానే పాలకూర, బాదం పప్పులే తింటుంటాం. కానీ వాటికంటే ఎక్కువ ఐరన్ ఇచ్చే నిజమైన విజేతలు వేరే ఉన్నారని న్యూట్రిషనిస్ట్ చెబుతున్నారు. ఇక కొత్తిమీర కంటే పుదీనాలో, పాలకూర కంటే తోటకూరలో ఐరన్ చాలా ఎక్కువగా ఉంటుంది. అలాగే అందరూ ఇష్టంగా తినే మామిడిపండు కంటే నేరేడు పండులో బాదం పప్పుల కంటే జీడిపప్పులో ఐరన్ మోతాదులు మెండుగా ఉంటాయి.
ఈ గింజలు, పప్పులు మర్చిపోవద్దు: చిరుధాన్యాలలో జొన్నల కంటే సామలు లేదా ఉదాలు (సమక్ రైస్) తింటే ఐరన్ బాగా అందుతుంది. మన రోజువారీ వంటల్లో వాడే పెసరపప్పు కంటే ఎర్ర కందిపప్పు (మసూర్ దాల్) లో ఎక్కువ పోషకాలు ఉంటాయి. ఇక సమ్మర్లో ఎక్కువగా వాడే సబ్జా గింజల కంటే పుచ్చకాయ గింజలలో ఐరన్ శాతం చాలా ఎక్కువని పరిశోధనలు చెబుతున్నాయి.
ఐరన్ ఒంటికి పట్టాలంటే ఇలా చేయండి: మనం ఐరన్ ఉన్న ఆహారం తిన్నా, అది శరీరానికి అబ్బాలంటే ఒక చిన్న ట్రిక్ ఫాలో అవ్వాలి. ఐరన్తో పాటు విటమిన్-సి కలిపి తీసుకుంటేనే అది ఒంటికి బాగా పడుతుంది. అందుకే భోజనంలో నిమ్మరసం లేదా ఉసిరికాయ ముక్కలు ఉండేలా చూసుకోండి. ఇక అలాగే చాలామందికి భోజనం చేసిన వెంటనే టీ లేదా కాఫీ తాగే అలవాటు ఉంటుంది. దీనివల్ల ఐరన్ సరిగ్గా అబ్సార్బ్ అవ్వదు. కాబట్టి భోజనానికి, టీ- కాఫీకి మధ్య కనీసం గంట గ్యాప్ ఇవ్వండి.
శరీరంలో రక్తం కొరత రాకుండా ఉండాలంటే ఖరీదైన మందులు అవసరం లేదు. మన చుట్టూ అందుబాటులో ఉండే తోటకూర, పుదీనా, సామలు, నేరేడు పండ్ల లాంటి దేశీ ఆహారాలను డైట్లో చేర్చుకుంటే చాలు, హిమోగ్లోబిన్ లెవెల్స్ సూపర్ గా పెరుగుతాయి.
గమనిక: మీకు తీవ్రమైన రక్తహీనత (ఎనీమియా) సమస్య ఉంటే, కేవలం ఆహారం పైనే ఆధారపడకుండా ఒకసారి డాక్టర్ను సంప్రదించి అవసరమైన ఐరన్ సప్లిమెంట్స్ తీసుకోవడం మంచిది.