మీరు ఎప్పుడైనా ఆలోచించారా? అందంగా కనిపించడం కోసం ఏ దేశ ప్రజలు ఎక్కువగా సర్జరీలు చేయించుకుంటారో? సాధారణంగా మనం అమెరికా లేదా లండన్ అనుకుంటాం. కానీ, జనాభా నిష్పత్తి ప్రకారం చూస్తే దక్షిణ కొరియా (South Korea) ఈ విషయంలో ప్రపంచంలోనే మొదటి స్థానంలో ఉంది.

ఇక్కడ ప్లాస్టిక్ సర్జరీ చేయించుకోవడం అనేది చాలా సాధారణమైన విషయంగా మారిపోయింది.

కే-పాప్, కే-డ్రామాల ప్రభావం: దక్షిణ కొరియాలో సంగీతం (K-Pop), సినిమాలు (K-Dramas) ప్రపంచవ్యాప్తంగా ఎంత ఫేమస్సో మనకు తెలిసిందే. వాటిలో నటించే హీరో హీరోయిన్లు పర్ఫెక్ట్ లుక్‌తో కనిపిస్తారు. వారిలాగే తాము కూడా అందంగా తెల్లగా మెరిసిపోతూ ఉండాలని అక్కడి యువత ఎక్కువగా ఆరాటపడుతుంటుంది. ఇక ఈ క్రేజ్ వల్లే అక్కడ సర్జరీల సంఖ్య విపరీతంగా పెరిగిపోయింది.

ఉద్యోగాల కోసం కూడా: మీరు నమ్మరు కానీ, అక్కడ కేవలం పెళ్లిళ్ల కోసమో, ఫంక్షన్ల కోసమో మాత్రమే కాదు.. ఉద్యోగం సంపాదించడం కోసం కూడా సర్జరీలు చేయించుకుంటారు. కంపెనీల ఇంటర్వ్యూల్లో టాలెంట్‌తో పాటు లుక్స్‌కి కూడా ఎక్కువ ప్రాధాన్యత ఇస్తారనే నమ్మకం అక్కడ ఉంది. ఇక అందుకే తల్లిదండ్రులు తమ పిల్లలు చదువు పూర్తి చేయగానే, బహుమతిగా ప్లాస్టిక్ సర్జరీ చేయిస్తుంటారు.

ఏ సర్జరీలు ఎక్కువ చేస్తారు?: ఇక్కడ ముఖ్యంగా ‘డబుల్ ఐలిడ్ సర్జరీ’ (కనురెప్పలను కాస్త పెద్దవిగా చేయడం), ముక్కును నిటారుగా మార్చడం, అలాగే ముఖాన్ని ‘V’ షేప్‌లోకి తీసుకురావడం వంటి సర్జరీలు ఎక్కువగా జరుగుతుంటాయి. ఇక సియోల్ నగరంలోని ‘గంగ్నమ్’ అనే ప్రాంతం ప్లాస్టిక్ సర్జరీ క్లినిక్‌లకు ప్రపంచంలోనే అతిపెద్ద హబ్‌గా పేరు తెచ్చుకుంది.