నేటి కాలంలో టైప్ 2 డయాబెటిస్ ఒక మహమ్మారిలా విస్తరిస్తోంది. అయితే రక్తంలో చక్కెర స్థాయిలను అదుపులో ఉంచడానికి కేవలం మందులే కాదు, మన శరీరంలో ఉండే మెగ్నీషియం కూడా కీలకమని మీకు తెలుసా?

మెగ్నీషియం లోపం ఉంటే ఇన్సులిన్ పనితీరు మందగించి చక్కెర స్థాయిలు పెరిగిపోతాయని వైద్య నిపుణులు హెచ్చరిస్తున్నారు. డయాబెటిస్ ముప్పు నుంచి తప్పించుకోవాలన్నా, ఉన్న వ్యాధిని అదుపు చేయాలన్నా మెగ్నీషియం పాత్ర ఏంటో ఇప్పుడు తెలుసుకుందాం.

మెగ్నీషియం – ఇన్సులిన్‌కు మంచి నేస్తం: మనం తిన్న ఆహారం నుంచి వచ్చే గ్లూకోజ్‌ను కణాలకు చేరవేయడానికి ఇన్సులిన్ అనే హార్మోన్ అవసరం. శరీరంలో మెగ్నీషియం సరైన మోతాదులో ఉన్నప్పుడు మాత్రమే ఇన్సులిన్ సమర్థవంతంగా పనిచేస్తుంది (దీనినే ఇన్సులిన్ సెన్సిటివిటీ అంటారు). మెగ్నీషియం తక్కువైతే, ఇన్సులిన్ ఉన్నప్పటికీ కణాలు గ్లూకోజ్‌ను స్వీకరించవు, ఫలితంగా రక్తంలో చక్కెర పేరుకుపోతుంది.

చక్కెర స్థాయిలపై ప్రభావం: మెగ్నీషియం లోపం ఉన్నవారిలో పరగడుపున మరియు భోజనం తర్వాత చక్కెర స్థాయిలు సాధారణం కంటే ఎక్కువగా నమోదవుతున్నట్లు అధ్యయనాలు చెబుతున్నాయి. దీర్ఘకాలికంగా ఈ లోపం కొనసాగితే, ఆరోగ్యవంతులు కూడా టైప్ 2 డయాబెటిస్ బారిన పడే అవకాశం ఉంది. ఇక మెగ్నీషియం రక్తంలోని గ్లూకోజ్ మెటబాలిజంను క్రమబద్ధీకరించడంలో సహాయపడుతుంది.

ఎలాంటి ఆహారం తీసుకోవాలి?: మెగ్నీషియం లోపాన్ని అధిగమించడానికి ఖరీదైన మందుల కంటే సహజ ఆహారాలే మేలు. పీచు పదార్థం ఎక్కువగా ఉండే ఆకుకూరలు (ముఖ్యంగా పాలకూర), బాదం, జీడిపప్పు వంటి డ్రై ఫ్రూట్స్, పొద్దుతిరుగుడు గింజలు, గుమ్మడి గింజల్లో మెగ్నీషియం పుష్కలంగా ఉంటుంది. ఇక అలాగే తృణధాన్యాలు, అరటిపండ్లు, డార్క్ చాక్లెట్ కూడా దీనికి మంచి వనరులు.

ఎవరికి లోపం వచ్చే అవకాశం ఉంది?: మద్యం ఎక్కువగా సేవించేవారు, కిడ్నీ సమస్యలు ఉన్నవారు మరియు ఇప్పటికే డయాబెటిస్ ఉండి చక్కెర స్థాయిలు నియంత్రణలో లేని వారిలో మెగ్నీషియం లోపం తలెత్తే అవకాశం ఎక్కువ. ఇక వీరు క్రమం తప్పకుండా వైద్య పరీక్షలు చేయించుకుంటూ శరీరంలోని ఖనిజాల స్థాయిలను గమనించుకోవాలి.